Հունաստանի ԱԳՆ ղեկավարը Թուրքիային անվանել է «լկստված երեխա»

Թուրքիայի ԱԳՆ-ն հայտարարություն է տարածել, որում պատասխանել էր Հունաստանի ԱԳՆ նորանշանակ նախարար Նիկոս Դենդիասի` Թուրքիայի վերաբերյալ հայտարարություններին:

«Կիպրոսի հատուկ տնտեսական գոտին պատկանում է Կիպրոսին: Ավելին` Թուրքիան պետք է հաշվի առնի, որ Կիպրոսը ԵՄ անդամ է: Թուրքիան ոչինչ չի շահի, եթե միջազգային իրավունքին հակառակ գործողություններ անի: Թուրքիան Միջերկրականի արևելյան ջրերում պետք է դադարի իրեն լկստված երեխայի պես պահել, պետք է հանդես գա որպես ժամանակակից և լուրջ դերակատար»,- հայտարարել էր Դենդիասը:

«Մենք քննադատում ենք մեր գործողություններն անօրինական որակելը:  ԵՄ անդամ երկիր լինելը ձեզ Կիպրոսի թուրքերի իրավունքներն ու շահերը ոտնահարելու իրավունք չի տալիս»,- Թուրքիայի ԱԳՆ հայտարարությունն է մեջբերում diken.com.tr կայքը:

Թուրքիայի ԱԳՆ-ն նաև նշել է, որ ԵՄ-ն չի կարող միջնորդ լինել այս խնդրում թուրքերի և հույների միջև:

Նշենք, որ Թուրքիայի նկատմամբ քննադատություններն ավելացան այն բանից հետո, երբ հունիսի 20-ին Թուրքիան Կիպրոսի ափերի մոտ ուղարկեց նաև երկրորդ` «Յավուզ» նավը: