Հունաստանի ԱԳՆ-ն կոչ է արել Թուրքիային` հարգել Սբ Սոֆիայի տաճարի կարգավիճակը

Հունաստանի արտաքին գործերի փոխնախարար Մարկոս Բոլարիսը հույս է հայտնել, որ Թուրքիան կհարգի միջազգային իրավունքն ու Սբ Սոֆիայի տաճարի կարգավիճակը. հայտնում է ensonhaber.com կայքը:

Բոլարիսը դարձյալ անդրադարձել է Թուրքիայի նախագահ Ռեջեփ Թայիփ Էրդողանի` մեծ աղմուկ հանած այն հայտարարությանը, թե շուտով նախատեսվում է թանգարանի կարգավիճակ ունեցող տաճարը վերածել մզկիթի:

«Հունաստանը մշտապես հենվում է միջազգային իրավունքի վրա: Դա միայն քաղաքականության հետ կապ չունի, այլ նաև` մշակույթի: Կա ՄԱԿ և ՅՈւՆԵՍԿՕ: Հուշարձանների կարգավիճակ կա: Բոլորին կոչ ենք անում հարգել միջազգային իրավունքը, միջազգային համաձայնագրերը, հարևաններին: Հույս ունենք, որ Թուրքիան ևս կհարգի միջազգային իրավունքն ու տաճարի կարգավիճակը»,- ասել է նա:

Սբ Սոֆիայի տաճարը կառուցվել է 6-րդ դարում Հուստինիանոս I կայսեր օրոք: Տաճարի ճարտարապետներից մեկը համարվում է Տրդատը: 1453 թ. Օսմանյան կայսրության կողմից Կ.Պոլսի գրավումից հետո տաճարը վերածվել է մզկիթի, իսկ 1935 թ. Մուսթաֆա Քեմալ Աթաթուրքն այն դարձնում է թանգարան: