Թուրքիան Հունաստանի, Եգիպտոսի և Կիպրոսի համատեղ հայտարարությունն անվանել է «թշնամական քաղաքականության դրսևորում»

Թուրքիայի ԱԳՆ-ն հայտարարել է, որ Հունաստանի, Եգիպտոսի և Կիպրոսի ղեկավարների եռակողմ գագաթնաժողովից հետո տարածված հայտարարությունը Աթենքի և Կիպրոսի հույների «թշնամական քաղաքականության դրսևորումն է Թուրքիայի նկատմամբ»։

Աթենքում ավելի վաղ անցկացված եռակողմ գագաթնաժողովից հետո Հունաստանը, Կիպրոսը և Եգիպտոսը համատեղ դատապարտել էին Թուրքիայի գործողությունները Արևելյան Միջերկրական ծովում. գրում է Turkish Minute-ը։

«Մենք համաձայն ենք Թուրքիայի սադրիչ գործելակերպի և ագրեսիվ հռետորաբանության դատապարտմանը։ Ցավոք, Անկարան կարծես թե չի հասկանում ժամանակի թելադրանքը: Թուրքիայի նկրտումները վտանգում են ողջ տարածաշրջանի խաղաղությունը»,- ասվում է Եգիպտոսի նախագահ Աբդել Ֆաթահ աս Սիսիի, Կիպրոսի նախագահ Նիկոս Անաստասիադիսի և Հունաստանի վարչապետ Կիրիակոս Միցոտակիսի համատեղ հայտարարության մեջ:

Թուրքիայի արտգործնախարարության պատասխան հայտարարության մեջ նշվել է, որ այդ հռչակագիրը ոչ այլ ինչ է, եթե ոչ Թուրքիայի և Հյուսիսային Կիպրոսի Թուրքական Հանրապետության (ՀԿԹՀ) հույների և Կիպրոսի հույների թշնամական քաղաքականության դրսևորում։

«Մյուս կողմից՝ Եգիպտոսի մասնակցությունն այս հայտարարությանը վկայում է այն մասին, որ Կահիրեն դեռ չի հասկացել, թե ով կարող է դառնալ իրական գործընկեր, ում հետ կարող է համագործակցել Արևելյան Միջերկրական ծովում»,- ընդգծել են նախարարությունում:

Հիշեցնենք, որ Արևելյան Միջերկրականը Թուրքիայի և Հունաստանի միջև լարվածության սրման կենտրոնում է անցյալ տարվանից, երբ Անկարան հետազոտական նավ ուղարկեց վիճելի ջրեր: Այս քայլն արվել է այն բանից հետո, երբ 2019 թվականին Կիպրոսը, Հունաստանը, Եգիպտոսը, Իսրայելը, Հորդանանը, Իտալիան և Պաղեստինը պայմանավորվել են ստեղծել Արևելյան միջերկրածովյան գազային ֆորում առանց Թուրքիայի մասնակցության։ Այնուհետև Եգիպտոսը ծովային համաձայնագիր ստորագրեց Հունաստանի հետ, երբ Թուրքիան մասնատված Լիբիայի թուրքամետ կառավարության հետ ծովային պայմանագիր ստորագրեց` անտեսելով Միջերկրածովյան երկրների իրավունքները: