Փայլանը քննադատել է թուրք ազգայնական պատգամավորին` հակահայկական արտահայտությունների համար

Թուրքիայի քրդամետ Ժողովուրդների դեմոկրատական կուսակցության` Դիարբեքիրից պատգամավոր Կարո Փայլանն անդրադարձել է «Գորշ գայլերի» քաղաքական միավորում հանդիսացող «Ազգայնական շարժում» կուսակցության` Իգդիրից նախկին պատգամավոր, հակահայկական գործունեությամբ հայտնի Սինան Օղանի թվիթերյան գրառմանը:

Ազգայնական գործիչն իր դժգոհությունն է հայտնել Իգդիրում, Կարսում և Վանում հայկական պատվիրակությունների այցերի, մասնավորապես` Համահայկական խաղերի պատվիրակության այցի վերաբերյալ: «Դեռ չեն հասցրել չորանալ ընտրությունների քվեաթերթիկների վրայի կնիքները, բայց արդեն հայկական պատվիրակություններն իրար հետևից հաճախակի այցելում են ԺԴԿ-ի հաղթած Կարսի, Վանի, Իգդիրի քաղաքապետարաններ: Պատահականությո՞ւն է: Չեմ կարծում»,- նշել է Օղանը:

Ի պատասխան այս գրառմանը` Փայլանը գրել է. «Ռասիստները, ժողովուրդների միջև գծեր քաշելով, ատելության քաղաքականություն են իրականացնում: Ժողովրդավարներն էլ, կամուրջներ կառուցելով, այդ սահմաններն իմաստազրկում են: Դուք ռասիստ պանթյուրքիստ եք: Մենք հավատում ենք ժողովուրդների եղբայրությանը: Եվ ժողովուրդներն անպայման գրկախառնվելու են»: