Գարո Փայլանը քննադատել է Էրդողանին՝ քրդերի դեմ հակահայկական արտահայտությունը դարձյալ օգտագործելու համար

Թուրքիայի Ազգային մեծ ժողովի պատգամավոր, քրդական Ժողովուրդների դեմոկրատական կուսակցության անդամ Գարո Փայլանը մեկնաբանել է երկրի նախագահ Ռեջեփ Թայիփ Էրդողանի սկանդալային հայտարարությունը։

Ելույթի ընթացքում, խոսելով ահաբեկչության մասին, Էրդողանը նշել է, որ Թուրքիայում կան ահաբեկիչներ, որոնք «թրից փրկված» են (թրք. kılıç artığı):

«Էրդողանը երեկ երեկոյան ատելություն պարունակող իր ելույթում դարձյալ օգտագործել է «թրից փրկված» արտահայտությունը։  «Թրից փրկվածը» Հայոց ցեղասպանությունից փրկված և իմ մեծ տատիի նման որբերին էին ասում։ Ամեն անգամ, երբ լսում ենք այդ արտահայտությունը, մեր վերքերը դարձյալ արնահոսում են։ Դա շատ դաժան արտահայտություն է», - գրում է Փայլանը։

Նշենք նաև, որ այս արտահայտությունը հաճախ ասում են նաև ալևիներին։ «Գորշ գայլերի» քաղաքական կազմակերպության՝ Ազգայնական շարժում կուսակցության նախագահ Դևլեթ Բահչելին նմանատիպ արտահայտություն էր արել ալևիների և դերսիմցիների հասցեին՝ նկատի ունենալով, որ 1930-ական թվականներին Դերսիմի կոտորածներից հետո ալևիներն ու դերսիմցիները փրկվել են։