Ինդոնեզիայում ձերբակալվել է ասիական մեծագույն ահաբեկչական խմբավորման ղեկավարը

Ինդոնեզիայի մայրաքաղաք Ջակարտայից մոտ 25 կմ հեռու գտնվող փոքր քաղաքում ձերբակալվել է Ասիայի հարավարևելյան հատվածում գործող «Ջեմաահ Իսլամիա» ահաբեկչական խմբավորման գլխավոր առաջնորդ Պարա Վիջայանտոն, որը 16 տարի հետախուզման մեջ էր: Այս մասին գրում է straitstimes.com-ը:

Նշվում է, որ ավելի քան 50 տարեկան տղամարդն  Ասիայի խոշորագույն ահաբեկչական խմբավորման ղեկավարի դերը ստանձնել էր դեռևս 2008 թվականին, երբ խմբավորման նախկին ղեկավարը ձերբակալվել էր Մալայզիայում ու արտահանձնվել Ինդոնեզիային:

Ահաբեկչի ձերբակալությունից հետո տեղի ոստիկանությունը խուզարկել է նրա վարձակալած տունը` հայտնաբերելով զենք-զինամթերք, ինչպես նաև ծայրահեղական բովանդակությամբ գրականություն:

«Ջեմաահ Իսլամիա»-ն Ինդոնեզիայում իրականացված ամենաարյունալի ահաբեկչական հարձակման  կազմակերպիչն է: Այն տեղի է ունեցել Բալիում 2002 թվականին` դառնալով ավելի քան 200 մարդու մահվան պատճառ:

Ըստ որոշ չճշտված տեղեկությունների` ասիական խմբավորումը առնչություն ունի «Ալ Քաիդա»-ի հետ: