Ահաբեկչական խմբավորման ներկայացուցիչները հայ հրոսակախմբերի հետ գործում են մեր դեմ. Էրդողանի զառանցանքները

Թուրքիայի նախագահ Ռեջեփ Թայիփ Էրդողանը հանդիպել է ոստիկանության ներկայացուցիչների հետ և օրակարգային թեմաների մասին ելույթով հանդես եկել. տեղեկացնում է Demokrathaber-ը:

Էրդողանը նշել է, որ իրենք շարունակելու են պայքարել «զուգահեռ պետություն ստեղծել ջանացող կառույցի դեմ», ինչի համատեքստում էլ հերթական զառանցանքներ է հնչեցրել հայերի հասցեին՝ մեղադրելով «հայ հանցախմբերին» այդ կառույցի հետ համագործակցելու և Թուրքիայի դեմ դավադրություններ կազմակերպելու մեջ:

«Այս դավաճան հանցախումբն աշխարհի բոլոր անկյուններում Թուրքիայի դեմ աշխատանք է տանում: Ուր էլ գնանք, տեսնում ենք, որ զուգահեռ կառույցի անջատողական ահաբեկչական խմբավորման ներկայացուցիչները, հայ հրոսակախմբերի հետ ուս ուսի տված, գործում են ընդդեմ մեր պետության»,- հայտարարել է Թուրքիայի նախագահը:

Նրա խոսքով՝ ինքն անձամբ դրա ականատեսն է եղել ԱՄՆ-ում կոնֆերանսի ժամանակ: «Այդ կառույցը Քուրդիստանի բանվորական կուսակցության (ՔԲԿ-PKK), հայկական ահաբեկչական խմբավորման հետ իմ անձի և իմ պատվիրակության դեմ ցույցեր կազմակերպեց»,- ասել է Էրդողանը:

Նա խոստացել է, որ «հակաթուրքական» այդ ուժերի դեմ պայքարը չի մնալու միայն Թուրքիայի ոստիկանության ու անվտանգության ուժերի ուսին՝ նշելով, որ Թուրքիա պետությունը, ի վերջո, հաղթելու է իր դեմ գործող ուժերին:

Նշենք, որ «զուգահեռ կառույց» կամ «զուգահեռ պետություն» անվանում են ամերիկաբնակ, Էրդողանի գլխավոր ընդդիմադիր Ֆեթուլլահ Գյուլենի գլխավորած իսլամական շարժումը: