Եվրոպան չի ցանկանում որևէ գին վճարել Միջուկային գործարքի պահպանման համար. Իրանի ԱԳՆ տեղակալ

Իրանի ԱԳ նախարարի` քաղաքական հարցերով տեղակալ Աբաս Արաղչին երեկ հանդիպել է Թեհրան այցելած` Մեծ Բրիտանիայի ԱԳՆ տեղակալ, Մերձավոր Արեւելքի հարցերով պետնախարար Էնդրյու Մորիսոնի հետ. հաղորդում է ԻՌՆԱ-ն:

Հանդիպման ընթացքում կողմերը քննարկել են Միջուկային համապարփակ համաձայնագրի հետ կապված վերջին իրադարձությունները եւ զարգացումները, դրա պահպանման հնարավորություններն ու հեռանկարները:

Իրանի ԱԳՆ տեղակալը նշել է, որ Իրանը համոզված է, որ եվրոպացիները չեն կատարում Միջուկային գործարքով նախատեսված գործողությունները ոչ թե անկարողության, այլ քաղաքական կամքի բացակայության պատճառով: «Եվրոպան չի ցանկանում վճարել թեկուզ չնչին գին՝ այս գործարքը պահպանելու համար»,- ասել է նա՝ հաւելելով. «Ցավոք, մեր հանձնառությունների եւ իրավունքների միջեւ հավասարակշռություն գոյություն չունի, հետեւաբար, չկա որեւէ պատճառ Իրանի կողմից ստանձնած պարտավորությունները շարունակելու համար»: