Միջուկային գործարքի պահպանման համար անհրաժեշտ է եվրոպական կողմի ներդրումը. Զարիֆ

Միջուկային համապարփակ համաձայնագրի պահպանման համար եվրոպական կողմի միայն ցանկությունը բավարար չէ: Դրա համար անհրաժեշտ է որոշակի ներդրում, որի ականատեսը դեռեւս չենք եղել: Այս մասին Նյու Յորքում լրագրողների հետ զրույցում ասել է Իրանի ԱԳ նախարար Մոհամադ Ջավադ Զարիֆը. հաղորդում է ԻՌՆԱ-ն:

«Եվրոպացիները հայտարարում են, որ ցանկանում են պահպանել Միջուկային գործարքը: Սակայն մենք դեռեւս չենք տեսել, որ նրանք պատրաստ են ներդրում կատարել այդ նպատակով»,- ասել է նա՝ հավելելով. «Այն, որ հայտարարում եք միջազգային որեւէ համաձայնագրի պահպանման` ձեր ցանկության մասին, մի բան է, իսկ այդ նպատակով որոշակի ներդրում կատարելը՝ բոլորովին այլ բան: Եվրոպացիները դեռեւս դա ցույց չեն տվել»:

Զարիֆը Նյու Յորք է մեկնել՝ մասնակցելու ՄԱԿ-ի տնտեսական-սոցիալական խորհրդի նիստին: