Մեծ Բրիտանիայի ԱԳ նախարարը նոր ջանքեր է գործադրում Միջուկային գործարքի պահպանման համար

Մեծ Բրիտանիայի ԱԳ նախարար Ջերեմի Հանթը Միջուկային համապարփակ համաձայնագրի պահպանման ուղղությամբ նոր ջանքեր կգործադրի: Այս մասին աստեղեկացնում Associated press գործակալությունը:

Մեծ Բրիտանիայի վարչապետի պաշտոնի թեկնածու Ջերեմի Հանթը ժամանակավորապես դադարեցրել է իր նախընտրական քարոզարշավը եւ մեկնել Բրյուսել՝ մասնակցելու ԵՄ ԱԳՆ ղեկավարների խորհրդի նիստին: Նա խոստացել է ջանք  չխնայել Իրանի հետ Միջուկային համապարփակ համաձայնագրի պահպանման եւ տարածաշրջանում էսկալացիայի թուլացման համար:

Գործակալությունն ընդգծում է, որ Բրիտանիայի արտաքին քաղաքական գերատեսչության ղեկավարը հարցի զգայունության  եւ կարեւորության պատճառով որոշել է անձամբ ուղեւորվել Բրյուսել՝ մասնակցելու ԵՄ ԱԳ ղեկավարների խորհրդի նիստին, որի օրակարգում է նաեւ Իրանի հարցը:

«Մերձավոր Արեւելքն այսօր աշխարհի ամենաանկայուն հատվածներից մեկն է, եւ եթե տարածաշրջանի երկրները միջուկային զենք ունենան, այն կվերածվի մարդկության դեմ գլոբալ սպառնալիքի»,-  ըստ Guardian-ի` ասել է Հանթը՝ շեշտելով, որ ջանք կգործադրի իրավիճակի հետագա սրումը կանխելու համար: