Ռուս զբոսաշրջիկներին խորհուրդ են տալիս զերծ մնալ Վրաստան այցից

ՌԴ Դաշնային խորհրդի միջազգային հարաբերությունների կոմիտեի փոխնախագահ Վլադիմիր Ջաբարովը հորդորել է ռուս զբոսաշրջիկներին` առաջիկայում Վրաստան չայցելել, քանի դեռ այնտեղ վիճակը չի կայունացել. հայտնում է РИА Новости-ն:

«Ինչի՞ համար ռիսկի դիմել: Թող վրացական իշխանությունները նախ կարգավորեն իրավիճակը»,- ասել է նա:

Սենատորը չի բացառել, որ իրավիճակն առաջիկա օրերին լարված կլինի: Միևնույն ժամանակ, Վրաստանում կատարվածը նա որակել է որպես այդ երկրի ներքին գործը` նշելով, որ Ռուսաստանը ընդդիմության  համար միայն պատրվակ էր:

Երեկ Վրաստանի խորհրդարանում անցկացվող` Ուղղափառության միջխորհրդարանական վեհաժողովի ժամանակ սկանդալ է տեղի ունեցել: Վրացի  ընդդիմադիր պատգամավորներին դուր չի եկել, որ Ռուսաստանի Պետդումայի պատգամավոր Սերգեյ Գավրիլովը, որը նախագահում էր նիստը, նստել է Վրաստանի խորհրդարանի խոսնակի տեղում: Ավելի ուշ ակտիվիստները հավաքվել են խորհրդարանի շենքի մոտ և այրել ՌԴ նախագահ Վլադիմիր Պուտինի նկարը: Այնուհետև իրավիճակն ավելի է լարվել:

Գիշերը Թբիլիսիի խորհրդարանի մոտ հարյուրավոր ցուցարարներին ցրելու համար Վրաստանի ՆԳՆ-ն կիրառել է ջրցաններ, ռետինե փամփուշտներ, զրահամեքենա, հրշեջ մեքենա և լուսաձայնային նռնակներ: Նրանք պահանջում էին ՆԳՆ ղեկավարի և խորհրդարանի նախագահի հրաժարականը: