Ռուս զբոսաշրջիկներին դիտավորյալ սպանել են

Թուրքիայի դատախազությունը ռուս զբոսաշրջիկների թունավորումը անորակ ալկոհոլային խմիչքով համարում է դիտավորյալ սպանություն: Այդ մասին հայտնել է Մոսկվայում Թուրքիայի դեսպանատան մշակույթի ու զբոսաշրջության հարցերով խորհրդական Ջելյալ Քիլիչը:

«Այս դեպքում խոսքը չի գնում անորակ սննդով անփութության կամ անպատասխանատվության հետևանքով թունավորման մասին: Նա, ով սպիրտային խմիչքներին ավելացրել է մեթանոլ, գիտեր, որ թույն է ավելացնում, ինչի հետևանքով կարող են զոհվել մարդիկ»,- ասել է նա:

Ըստ «Նովոստի» գործակալության` նա նաև ասել  է, որ կեղծ ալկոհոլի պատրաստման մեջ կասկածվող անձինք ձերբակալված են, և մամուլի այն պնդումները« թե նրանք ազատ են արձակվել, իրականությանը չի համապատասխանում:

Հիշեցնենք, որ ալկոհոլային թունավորումը տեղի էր ունեցել թուրքական Բոդրում զբոսաշրջային կենտրոնում: Հիվանդանոց էին դիմել 20 մարդ, որոնցից 4-ը մահացել էին: