Բրիտանիան իր քաղաքացիներին խորհուրդ է տալիս զերծ մնալ հայ-ադրբեջանական սահման մեկնելուց

Բրիտանական կառավարությունն իր քաղաքացիներին կոչ է արել զերծ մնալ Հայաստանի սահմանամերձ շրջաններ այցելելուց` Ադրբեջանի հետ հարաբերություններում պահպանվող լարվածության պատճառով:

«Հայ-ադրբեջանական սահմանը շարունակում է փակ մնալ։ Խորհուրդ է տրվում խուսափել Հայաստանի և Ադրբեջանի միջև արևելյան սահմանից 5 կմ հեռավորության վրա ցանկացած ուղևորությունից: Դա կապված է երկու երկրների միջև հակամարտության հետ։ Այդ շրջաններում հյուպատոսական աջակցությունը խիստ սահմանափակ է», - նշվում է հաղորդագրության մեջ։

Բրիտանական իշխանությունները այցելության համար վտանգավոր են համարում նաև Տավուշի մարզի Իջևան-Նոյեմբերյան ճանապարհահատվածը։ Նշվում է նաև, որ հայ-թուրքական սահմանը շարունակում է փակ մնալ` չնայած Երևան-Ստամբուլ չվերթերի առկայությանը:

Բացի այդ, հաղորդագրության մեջ ընդգծվում է, որ Հարավային Կովկասով ճանապարհորդելը կարող է անկանխատեսելի լինել, իսկ ենթակառուցվածքները միշտ չէ, որ լավ վիճակում են: