Մարդիկ կան, որ մի բանը 15 անգամ պիտի ասես, որ մտնի, մեկ է՝ չի մտնում. Ռոբերտ Քոչարյանը լրացրեց պաշտպանի խոսքը

Ցանկացած կալանավորման ժամանակ, որը տեղի է ունենում ապագայի կանխատեսումների վրա, հաշվի են առնվում միայն հանցագործության  հնարավոր ծանրությունը և անձին բնութագրող հատկանիշները, ստացվում է՝ անձին կալանավորում ենք որպես պատիժ. դատարանում հայտարարեց ՀՀ երկրորդ նախագահի պաշտպաններից Արամ Օրբելյանը:

«Չունենք մի դեպք, որ անձը խոչընդոտած լինի: Պարոն Ալումյանը նշեց, որ վերադարձել էր, չի խոչընդոտել: Մի դեպք էլ եմ ուզում ներկայացնել. Վերաքննիչ դատարանը, երբ որոշեց պարոն Քոչարյանին կալանավորել, նա է գնացել կալանավայր»,- նշեց փաստաբանը՝ հավելելով, որ հիմք չկա կալանավորման համար, և ներկայացրեց բոլոր այն դեպքերը, երբ Քոչարյանն ուներ բացարձակ ազատություն և երկիրը լքելու որևէ սահմանափակում չուներ, բայց նա բուժման նպատակով երկիրը լքելու համար դիմել էր, քանի որ հարգում է պետական մարմնին։

Այստեղ Ռոբերտ Քոչարյանը հավելեց. «Մեկ ժամից ավելի սպասել եմ, թե երբ է քննիչը թուղթը բերելու, որ ինձ տանեն: Հարգելի' դատավոր, ստիպված ենք ասել, քանի որ կան մարդիկ, որ մի բանը 15 անգամ պիտի ասես, որ մտնի,  մեկ է՝ չի մտնում»: