Բանը հասել է նրան, որ ՄԻՊ-ի միջամտությամբ է պաշտպանը մտնում ՔԿ, սա նշան է, որ պետությունը լուրջ մտածելու տեղ ունի․ փաստաբան

«Առավոտյան երեխաներին առանց հանձնուք ստանալու, առանց հաց ուտելու, որովհետև ասեցին շտապ է, պետք է բերեն ՔԿ քաղաքային վարչություն»-Քննչական կոմիտեի դիմաց լրագրողների հետ զրույցում նշեց Ծաղկազարդի օրը Սուրբ Աննա եկեղեցում պատարագի ընթացքում տեղի ունեցած միջադեպի մասնակից 18-ամյա եղբայրների փաստաբան Լուսինե Մարտիրոսյանը։

Նա հենց շենքի դիմացից զանգահարեց ՄԻՊ և հայտնեց հետևյալը. «Ժամը 11-ին պաշտպաններին ծանուցել են, որ լինեն քաղաքի վարչությունում վարույթային գործողության։ Այս պահին ժամը 11:46 է, Երևան քաղաքի վարչության դռները փակ են, պաշտպանները չեն կարողանում ներս մտնել, երեխաները ներսում են։ Ես խնդրում եմ ձեր արագ միջամտությունը, մենք խոսում ենք առողջական խնդիրներ ունեցող երեխաների մասին, որոնք առավոտյան չեն էլ թողել հաց ուտեն, բերել են քաղաքի վարչություն, որ ինչ-որ շտապ գործողություն ունեն անելու, մինչև այս պահը պաշտպանները չեն կարողանում ներս մտնել։ Խնդրում եմ այս անգամ արագ արձագանքեք, չլինի այնպես, ինչպես բերման ենթարկելու օրը, երբ բոլոր գործողությունները ավարտվեց, նոր պաշտպանները կարողացան բարձրանալ իրենց մոտ»։

Քիչ անց փաստաբան Լուսինե Մարտիրոսյանն ասաց. «Մարդու իրավունքների պաշտպանի գրասենյակից հայտնեցին, որ իրենք քննարկել են քննչական կոմիտեի հետ, միջոցներ են ձեռնարկել իրենց միջամտության արդյունքում, մեզ հիմա թույլ կտան, որ մենք մտնենք ներս։ Եթե բանը հասնում է նրան, որ ես պետք է զանգեմ մարդու իրավունքների պաշտպանի գրասենյակ մի ժամ էլ անցնի որ նոր մտնեմ ներս, պետությունը շատ լուրջ խնդիր ունի ու շատ լուրջ մտածելու բան ունի»։

Ի վերջո, փաստաբաններին թույլ տրվեց ներս մտնել։