Այդ թեմայից չեզոք և հեռու եմ. «Իմ քայլ»-ի պատգամավորը` իր եղբոր կողմից Երևանում մարիխուանայի օրվա միջոցառման կազմակերպման մասին

«Իմ քայլը» խմբակցության պատգամավոր Նիկոլայ Բաղդասարյանի սկզբունքն այն է, որ իր ազգականների հայտնած մտքերը չի ցանկանում «նույնականացնել, քանի որ նրանք ազատ են իրենց ցանկացած որոշումը կայացնելուն»: Ազգային ժողովում, լրագրողների հետ զրույցում նա այսպես մեկնաբանեց օրերս իր եղբոր կողմից կազմակերպված` Մարիխուանայի միջազգային օրվա հետ կապված միջոցառումները, հավելելով`ինքն «այդ թեմայից չեզոք և հեռու է»:

«Մեր ընտանիքը մեծ է, մաման այլ տեսակետ ունի, էն մեկն՝ այլ: Ոչ միայն այդ հարցով, նաև` քաղաքական հայացքներով», - ասաց պատգամավորը:

Ինչ վերաբերում է հարցին, թե ինքը երբևէ օգտագործե՞լ է մարիխուանա, Բաղդասարյանը բացասական պատասխան տվեց` միևնույն ժամանակ ընդգծելով, որ ԱՄՆ-ում իր ընկերները շատ են օգտագործում մարիխուանա, որն այնտեղ ընդունելի է: «Բայց ես, օրինակ, դիսոնանս կզգամ, եթե իմանամ, որ իմ երեխան դրան մոտեցել է», - նշեց նա:

Հավելենք, որ օրերս Ազատության հրապարակում մի խումբ երիտասարդների կողմից նշվել էր Մարիխուանայի միջազգային օրը, որի ակտիվ մասնակիցներից մեկն էր  Նիկոլայ Բաղդասարյանի եղբայրը՝ Ալեքսանդր Բաղդասարյանը: