Փուչիկների թեմայից կարող եք դուրս գալ, որովհետև մեծացել եք արդեն. Կարեն Ավագյանը` հրդեհի մասին

ՀՀԿ-ական պատգամավոր Կարեն Ավագյանն այսօր լրագրողների հետ զրույցում հավաստիացրեց, որ ինքը կապ չունի երեկվա` Մարզահամերգային համալիրում բռնկված հրդեհի հետ, և «եթե հուր ու կրակ կար, ապա միայն իրենց սրտերում ու հոգիներում»:

Yerkir.am-ի դիտարկմանը, թե գուցե այդ հուրը տանեն այն ընտանիքներ, որտեղ մրսում են ու ի վիճակի չեն ջեռուցել բնակարանները, նա պատասխանեց. «Կփորձենք նման ծրագիր իրականացնել»:

Ավագյանը հավաստիացրեց, որ այդ հրդեհը որևէ կապ չի ունեցել համերգի հետ, միջոցառումը սկսվել և ավարտվել է ֆիքսված ժամին, այն բազմամարդ է եղել, և իրականում եթե «պաժար» եղել է, ապա միայն այն մարդկանց մոտ, ովքեր տեսան, որ Հայաստանի երիտասարդական կազմակերպությունը միայնակ կարող է նույնքան մարդ հավաքել, որքան մարդ չեն կարողանում հավաքել «աշխարհացունց միտինգների» կազմակերպիչները:

Լրագրողները խորհուրդ տվեցին նրան դիմել էքստրասենսներին ու գրբացներին, որ այլևս հրդեհները նրան չհետապնդեն, Կարեն Ավագյանն էլ խոստացավ մտածել այդ ուղղությամբ:

Լրագրողները հիշեցրեցին փուչիկների տխուր պատմությունը, նա էլ խորհուրդ տվեց. «Փուչիկների թեմայից կարող եք դուրս գալ, որովհետև մեծացել եք արդեն»:

Հարցին, թե ինչո՞ւ որոշվեց համերգ կազմակերպել ռազմական ողբերգության` կործանված ուղղաթիռի ֆոնին, Կարեն Ավագյանը պատասխանեց. «Դուք մտածում եք, որ չէ՞ր կարելի նշել, այն էլ` ռազմահայրենասիրական համերգով ու ոգով»:

Լրագրողներից մեկի հումորով հարցին` հաջորդիվ ի՞նչ եք պատրաստվում հրդեհել, նա պատասխանեց. «Ոչինչ էլ չենք պատրաստվում հրդեհել»: