Սփյուռքի նախարարության փոխարեն՝ եռաստիճան համակարգ. կառավարության նոր կառուցվածքը և կազմը

Կառավարությունն այսօր հավանություն տվեց «Կառավարության կառուցվածքի և գործունեության մասին» Հայաստանի Հանրապետության օրենքում փոփոխություններ և լրացումներ կատարելու մասին» նախագծին և հարակից մի շարք օրենքներում փոփոխություններ և լրացումներ կատարելու մասին օրենքների նախագծերի փաթեթին:

Արդարադատության նախարար Արտակ Զեյնալյանը տեղեկացրեց, որ կկրճատվի առաջին փոխվարչապետի հաստիքը` 3 փոխվարչապետերի փոխարեն կլինի 2 փոխվարչապետ, իսկ 17 նախարարությունից կմնա 12-ը:

Ստորև ներկայացնում ենք կառավարության հաստատված կառուցվածքը և կազմը` ամբողջությամբ.

1. Կառավարությունը կազմված է վարչապետից, երկու փոխվարչապետերից և նախարարներից:

2. Կառավարության  կառուցվածքում ընդգրկվում են հետևյալ նախարարությունները`

ա) աշխատանքի և սոցիալական հարցերի նախարարություն,

բ) առողջապահության նախարարություն,

3) արդարադատության նախարարություն,

4) արտակարգ իրավիճակների նախարարություն,

5) արտաքին գործերի նախարարություն,

6) կրթության, գիտության, մշակույթի և սպորտի նախարարություն,

7) շրջակա միջավայրի նախարարություն,

8) պաշտպանության նախարարություն,

9) տարածքային կառավարման և ենթակառուցվածքների նախարարություն,

10) բարձր տեխնոլոգիաների արդյունաբերության նախարարություն,

11) էկոնոմիկայի նախարարություն,

12) ֆինանսների նախարարություն:

Արդարադատության նախարարը նշեց, որ Սփյուռքի նախարարությունը կմիավորվի վարչապետի աշխատակազմին, որում կստեղծվի Սփյուռքի գործերի գլխավոր հանձնակատարի ինստիտուտ: Միևնույն ժամանակ վարչապետի աշխատակազմում կստեղծվի Սփյուռքի գործերի գլխավոր հանձնակատարի հայեցողական պաշտոնը, նա կիրականացնի «վարչապետի՝ Սփյուռքի հետ կապված քաղաքականության ապահովման և Սփյուռքի հետ տարվող աշխատանքների միասնականության ապահովման լիազորությունների իրականացման աշխատանքների կազմակերպումը»:

«Ընդ որում` սա չի ենթադրում կառավարության առաջնահերթություններից Սփյուռքի հետ տարվող աշխատանքների կարգավիճակի իջեցում, ընդհակառակը՝ նախարարության փոխարեն առաջարկվում է ստեղծել եռաստիճան օպտիմալ համակարգ, որի առաջին մակարդակում իր դերակատարությունը կունենա հենց վարչապետը, երկրորդ մակարդակում` վարչապետի կողմից նշանակված Սփյուռքի գործերի գլխավոր հանձնակատարը, իսկ ստորին մակարդակում կլինի Սփյուռքի գործերի գլխավոր հանձնակատարի գրասենյակը: Առաջարկվում է սահմանել նաև, որ վարչապետի թույլտվությամբ կառավարության նիստն ամբողջությամբ կարող է ընթանալ դռնբաց, իսկ կառավարության և վարչապետի որոշումների հավելվածները ստորագրելու իրավազորությամբ կօժտվի վարչապետի աշխատակազմի ղեկավարը»,- մանրամասնեց Զեյնալյանը՝ հավելելով, որ կրճատվող աշխատատեղերը հիմնականում վերաբերում են քաղաքական և հայեցողական պաշտոններին, և որ նախարարությունների վերակազմավորման գործընթացի սկզբնական փուլում թվաքանակի այլ փոփոխություն չի նախատեսվում:

Իր հերթին ՀՀ վարչապետ Նիկոլ Փաշինյանը վստահեցրեց՝ կառավարության կառուցվածքային փոփոխության հիմնական խնդիրը պետական կառավարման արդյունավետությունը բարձրացնելն է, այդ թվում՝ Սփյուռքի հետ հարաբերությունների:

«Այսօր արդեն լուրջ խոցեր և խնդիրներ ենք տեսնում երկու ուղղությամբ: Բայց սրան մենք գնալու ենք հավասարակշռված և հանդարտ ճանապարհով՝ կադրային ջարդ չենք ունենալու, նախարարություններն իրենց հաստիքով կոնսոլիդացվելու են, ինչը չի նշանակում, թե շարունակելու են այդպես մնալ: Այո, կրճատումներ լինելու են, բայց էվոլյուցիոն տրամաբանությամբ են լինելու,  և յուրաքանչյուր պետական ծառայող, այս նախարարությունների յուրաքանչյուր աշխատակից իր շանսն է ստանալու: Եվ մարդկանց աշխատանքի գնահատումը պիտի լինի մաքսիմալ օբյեկտիվ՝ անկախ որևէ հարակից գործոնից»,- նշեց վարչապետը՝ հավելելով, որ բարձր որակավորում ունեցող մասնագետի համար պետական կառավարման համակարգը գրավիչ չէ, և որ պարգևավճարային սկանդալները հենց սրանից են ծագում, խնդիրն այստեղ է:

«Ովքե՞ր են մեր պետական համակարգի աշխատողները, մենք ի՞նչ պահանջներ ենք դնում նրանց առջև, արդյո՞ք պետական ծառայությունը պիտի ենթադրի երկրորդ, երրորդ, չորրորդ կարգի աշխատանք, թե՞ առաջին կամ երկրորդ կարգի: Այս թեմաները պետք է մաքսիմալ բաց և թափանցիկ քննարկենք»,- ասաց Փաշինյանը: