ԱՄՆ-ն ույղուրների հարցում աջակցում է Թուրքիային

Անկարայում ԱՄՆ դեսպանության թվիթերյան պաշտոնական հայտարարության մեջ մասնավորապես նշվում է, որ ԱՄՆ-ը միանում է Թուրքիայի ԱԳՆ գնահատականին: «Արդեն գաղտնիք չէ, որ մոտ մեկ միլիոն թյուրք ույղուր կամայականորեն ձերբակալվել են, նրանք պահվում են ճամբարներում ու բանտերում և ենթարկվում են խոշտանգումների և ուղեղի լվացման»,- ըստ «Անադոլու» գործակալության` ասվում է հայտարարության մեջ:

Նշենք, որ օրեր առաջ Թուրքիայի ԱԳՆ-ն հայտարարություն էր տարածել, որում խստորեն դատապարտում էր թյուրք ույղուրների նկատմամբ Չինաստանի վարած քաղաքականությունը և  շեշտում, որ ույղուրների նկատմամբ իրականացվող ուծացման քաղաքականությունը մարդկության դեմ ուղղված մեծ ամոթ է:

Իր հերթին, Չինաստանը հայտարարել է, որ դրանք մասնագիտական կրթական ճամբարներ են, որոնց նպատակը չինական հասարակությանը ույղուրներին ինտեգրելն է: