ԱՄՆ-ն ավելի հարմար առաջարկ է արել Թուրքիային «Պատրիոտ»-ների հարցում

Թուրքիայի պաշտպանության նախարար Հուլուսի Աքարը թուրքական NTV հեռուստաընկերությանը տված հարցազրույցում անդրադարձել է ռուսական Ս-400-ների և ամերիկյան «Պատրիոտ»-ների գնման խնդրին:

«ԱՄՆ-ի առաջարկը «Պատրիոտ»-ների վերաբերյալ, որը մենք ստացել ենք մարտ ամսին, ավելի դրական է մեզ համար և պարունակում է այն դիրքորոշումները, որոնց մասին մենք ի սկզբանե խոսում էինք: Մենք պատրաստվում ենք ոչ միայն գնել, այլև արտադրել սեփական հակաօդային պաշտպանության համակարգերը»,- նշել է նա:

Հիշեցնենք, որ փետրվար ամսին Էրդողանը հայտարարել էր, որ ԱՄՆ-ը չի կարող կատարել Անկարայի երկու հիմնական պահանջները «Պատրիոտ»-ների գնման հարցում` վարկի տրամադրում և համատեղ արտադրություն: Իսկ ապրիլ ամսին Թուրքիայի ՊՆ ղեկավարը հայտարարեց, որ Թուրքիան նոր առաջարկ է ստացել ԱՄՆ-ից, և շարունակվում են համակարգերի հավանական գնման բանակցությունները:

Թուրքիան բազմիցս է հայտարարել, որ, եթե նույնիսկ այդ գործարքը կայանա, չեն հրաժարվելու Ս-400-ներից: