Այնպես չէ, որ երեկ պաշտոն են ստացել, և այսօր ինչ ուզեն` պետք է փոխեն. Հայկազուն Ալվրցյանը` հիմնը փոխելու մասին

Ազգային ժողովի փոխնախագահ, «Իմ քայլը» խմբակցության պատգամավոր Ալեն Սիմոնյանը հայտարարել էր, որ պատրաստվում է նախաձեռնել ՀՀ օրհներգի փոփոխություն: Նա ցանկանում է, որ Արամ Խաչատրյանի կողմից գրված օրհներգի երաժշտությունը դառնա հիմն, որն, ի դեպ, Սովետական Հայաստանի հիմնն էր:

 

Yerkir.am-ի հետ զրույցում Արևմտահայոց հարցերի ուսումնասիրության կենտրոնի ղեկավար Հայկազուն Ալվրցյանը նշեց, որ հիմնի փոփոխության հարցն օրակարգային չէ` ըստ էության: Նրա խոսքով` մարդիկ պարզապես չգիտեն ինչ անել ու ուզում են հիմնից փոփոխությունը սկսել: «Խոսքը միայն հիմնի մասին չէ, այլ նաև խորհրդանիշերի, որը համակարգ է, ու կամաց-կամաց այն կփլուզվի: Սա կա'մ տգիտության, կա'մ էլ մեր խորհրդանիշերի դեմ դավադրության հետևանք է, ուրիշ բացատրություն չկա: Չնայած ինչո՞ւ չկա`հարցի էությունը գուցե չեն հասկանում, գուցե աղմուկ են ուզում բարձրացնել կամ էլ ուղղորդում են նրանց: Ելույթներում այնպիսի բաներ են ասում, օրինակ` Ալեն Սիմոնյանն ասում է` Խաչատրյանի ստեղծագործության տարբերակի մեջ շարական կա, ինչ-որ մասնագետների են հղում կատարում, թե իբր հիմնը մեր հոգեբանությունը չի արտահայտում: Ինչ-որ կիսագրագետ մարդիկ այդ գաղափարները լցրել են սրա-նրա գլուխը, և առանց անհարմար զգալու` հիմա այդ մասին են խոսում»,- ասաց Ալվրցյանը: 

 

Նրա գնահատականով` Ալեն Սիմոնյանի անփորձությունից է գալիս այս ամենը, քանի որ նա` որպես կարևոր պետական պաշտոնյա, իրավունք չունի նման անլուրջ խոսակցություն առաջ քաշելու ու դառնալու ուրիշի խոսափողը: Ալվրցյանը նշեց, որ Ալեն Սիմոնյանն այն Ազգային ժողովի փոխնախագահն է, որը 2018-ին ընդունել է մեր հիմնը: «Եթե անգամ հիմնը փոխելու խնդիր առաջանա, Սիմոնյանը դարձյալ խոսելու իրավունք չունի: Պետք է խորհրդարանը հանձնաժողով ստեղծի` համապատասխան մասնագետներից կազմված, որոնք էլ պետք է քննարկեն այդ հարցը, այն ներկայացնեն ժողովրդին, հանրաքվեի դրվի, ու որոշեն` ինչ է արվելու: Այնպես չէ, որ երեկ պաշտոն են ստացել և այսօր ինչ ուզեն, պետք է փոխեն: Փոփոխությո՞ւն եք ուզում, օրենքները վերափոխեք ու օրենքի այնպիսի  դրույթ մտցրեք, որ թույլ չտրվի երկիրը պարգևավճարների տեսքով թալանել»,-ասաց Ալվրցյանը: 

 

Նրա գնահատմամբ` երկրում ամենաթողության մթնոլորտ է ստեղծվել, և եթե ամեն մարդ քնում-արթնանում է որպես ապագա վարչապետ ու նախագահ, ու կարող են սրբապղծություններ անել` հերոսների, եկեղեցու հանդեպ, ապա ամեն ինչ հնարավոր է: 

Ալվրցյանի խոսքով` նոր ուժերը չեն հասկանում, որ իրենք պետության ղեկավարն են, ոչ թե հասարակական կազմակերպությունների:

 

«Ավելին ասեմ` խորհրդանիշերի նկատմամբ հակակրանքը գալիս է այն բանից, որ այն մտել է Հայաստանի Առաջին Հանրապետության խորհրդարան, որն իր հիմնական մասով դաշնակցական էր: Շատերն անգամ ասում էին` դաշնակցական հանրապետություն, և Ազգային ժողովը հիմնականում դաշնակցականներից էր կազմված, որոնք էլ ընտրել են խորհրդանիշերը: Հակադաշնակցական պայքարի այս  բովում նման դրսևորումներ են լինում` այն, ինչ ստեղծել է Դաշնակցությունը, պետք է մի կողմ դնել: Բավական է հիշել, թե Արամ Մանուկյանի արձանի տեղադրման հարցում ինչպիսի աղմուկ բարձրացվեց, ու պնդում էին, թե այն չպետք է տեղադրվի»,-ասաց Ալվրցյանը: 

 

Նա հավելեց նաև, որ Արամ Մանուկյանի արձանի տեղադրմանն էլ դեմ էին, քանի որ Մանուկյանը դաշնակցական էր: Ըստ Ալվրցյանի` ստացվում է այնպես, որ պետության հիմնադրի հանդեպ որևէ հարգանք ու պատիվ չկա, բայց նրանցից յուրաքանչյուրը կոստյումակրման արարողություն է անցկացնում: 

 

Դիտարկմանը` Արամ Խաչատրյանի գործն, այո, շատ լավն է, կամ ժամանակին Տիգրան Մանսուրյանի ստեղծագործությունն էր քննարկվում, որը չգիտես, թե ինչպես դուրս մնաց «հնարավոր» տարբերակների ցանկից, սակայն այդ նույն սկզբունքով` աշխարհում կան մի շարք լավ ստեղծագործություններ, և հարցին` ի՞նչ է,` դրանք բոլորը պետք է հերթով մեր հիմնը դառնան, Ալվրցյանը պատասխանեց, որ հիմնը երգեցողության, խոսքի մակարդակով չի որոշվում, այն պատմական արժեք է: «Որպես հիմն` ծառայում են այն երգերը, որոնք պատմականորեն ինչ-որ դերակատարություն են ունեցել: Շատ երկրներ չեն ունեցել նման ստեղծագործություններ, և պետություն ունենալուց հետո են իրենց հիմնը ստեղծել, իսկ մեր դեպքում հակառակն է եղել: Ավելին` մեր հիմնը մասնակցել է պետության ստեղծման գործընթացին: Հիմնը ժողովուրդն ինքն է ընտրել, և խորհրդարանին ոչինչ չէր մնում անել, քան ժողովրդի ընտրությունը վավերացնել ու օրենքի ուժ տալ: Ո՞վ ասաց, որ հիմա իրավունք ունի որևէ մեկը մեր ժողովրդի պատմական իրավունքը վերանայելու»,-ասաց Ալվրցյանը: 

 

Նա նշեց նաև, որ Արցախյան ազատամարտի ժամանակ էլ ժողովուրդն այդ հիմն էր երգում, և հազարավոր երիտասարդներ են թաղվել այդ հիմնի ներքո: Հիմնը, Ալվրցյանի խոսքով, հազարավոր զինվորներ է առաջնորդել դեպի պատերազմ: «Հիմա ո՞վ է այդ մեկը, որ պետք է ժողովրդի որոշումը փոխի: Սա ցույց է տալիս, որ նրանք հարցի խորքերը չեն հասկանում և մեղավոր չեն, որ չեն հասկանում` մեղավոր են նրանք, ովքեր նման մարդկանց բերել ու պաշտոն են տվել»,- խոսքն ամփոփեց Ալվրցյանը: