Եթե ուզենան փոխեն ԱԺ նախագահին, փոխխոսնակներին, ՀՀԿ-ն ձայներ չտա, չեն փոխվի. Գևորգ Կոստանյան

Խորհրդարանում լրագրողների հետ զրույցում ՀՀԿ-ական պատգամավոր Գևորգ Կոստանյանն անդրադարձավ որոշ իրավաբանների կարծիքին, որ եթե ՀՀԿ-ն հիմա ընդդիմություն է, ապա պետք է զիջի ԱԺ նախագահի, փոխնախագահների պաշտոնները, և նրան պետք է հասնի միայն մեկ փոխխոսնակի պաշտոն: Նա նշեց, որ ՀՀԿ-ն դեռևս շարունակում է խորհրդարանում մնալ մեծամասնություն:

«Սահմանադրական այդ կարգավորումը, որ վերաբերում է ընդդիմության` մեկ տեղակալ ունենալուն, չի նշանակում, որ եթե հավասարակշռությունը փոխվեց, ապա պետք է նախագահը և տեղակալները փոխվեն»,- բացատրեց Կոստանյանը, ապա հավելեց. «ԱԺ մեծամասնությունը չի փոխվել, եթե ուզենան փոխել ԱԺ նախագահին, փոխխոսնակներին, եթե ՀՀԿ-ն ձայներ չտա, չի ընտրվի»:

Հարցին էլ՝  արդյո՞ք սա սահմանադրական ճգնաժամ չէ, Կոստանյանը պատասխանեց. «Ես սա սահմանադրական ճգնաժամ չեմ համարում: Եթե սահմանադրական ճգնաժամ լիներ, ԱԺ-ն վարչապետ չէր ընտրի երկու անգամ կամ չէր հաստատի կառավարության ծրագրերը: Եթե լինի սահմանադրական ճգնաժամ, ապա դրա լուծումը կլինի ԱԺ` իրավունքի ուժով արձակումը»: