Ես ինքս ինձ պարգևատրելու իրավասություն չունեմ. Նարեկ Բաբայան

Պետական գույքի կառավարման կոմիտեի աշխատակիցներին ևս տրվել է 13-րդ աշխատավարձ: Այս մասին կառավարության նիստից հետո լրագրողների հետ զրույցում ասաց կոմիտեի նախագահ Նարեկ Բաբայանը: «13-րդ աշխատավարձ տրվել է` մինչև մեկ դրույքի չափով», - հայտնեց նա։

Հարցին՝ ինքն իրեն պարգևատրե՞լ է, Բաբայանը պատասխանեց. «Ես ինքս ինձ պարգևատրելու իրավասություն չունեմ»։

Նա նշեց, որ Պետական գույքի կառավարման կոմիտեն վերջին շրջանում նվիրատվություններ չի ստացել: Լրագրողները նրանից հետաքրքրվեցին` պետությունը Մանվել Գրիգորյանի նվիրաբերած գույքը ստացե՞լ է, թե՞ ոչ: «Պետությունը դեռ չի ընդունել Մանվել Գրիգորյանի կողմից նվիրաբերված գույքը։ Պետության ընդունելու դեպքում կառավարության որոշում կլինի»,- հայտնեց նա։

Բաբայանի խոսքով՝ այդ գործընթացն առայժմ կասեցված է, քանի որ դատախազությունը վերապահումներ է հայտնել։

Ինչ վերաբերում է Արմեն Ավետիսյանի ընտանիքին պատկանող «Գոլդեն փելըս» հյուրանոցին, նա ասաց, որ այս պահին դրան տնօրինում են Ավետիսյանները։ «Այս հարցով նույնպես կառավարության որոշում կլինի»,- ասաց Բաբայանը:

Պետգույքի կառավարման կոմիտեի ղեկավարը հերքեց մամուլի այն հրապարակումները, թե հյուրանոցը կառավարվում է ԱԺ պատգամավոր Սասուն Միքայելյանի որդու՝  Հրազդանի քաղաքապետի կողմից։ Նա ասաց, թե առայժմ չի ուսումնասիրվել՝ արդյո՞ք «Գոլդեն փելըս»-ը որևէ պարտք ունի՞ կամ գրավադրվա՞ծ է, թե՞ ոչ։