Երկխոսություն ինքս ինձ հետ. Հասմիկ Սևոյանի նկարների ցուցադրությունը` Նկարիչների միությունում

Վաղը Նկարիչների միությունում /ժամը 16-ին/ տեղի կունենա նկարչուհի Հասմիկ Սևոյանի աշխատանքների ցուցադրությունը: Yerkir.am-ի հետ զրույցում Սևոյանը նշեց, որ ցուցադրվելու են իր` վերջին երկու տարիների աշխատանքները:

«2 տարի առաջ Ժամանակակից արվեստի թանգարանում ցուցադրություն ունեցա, և հասունացել էր ժամանակը` Նկարիչների միությունում ցուցադրել իմ աշխատանքները: Սա, կարծես, հաշվետվության պես մի բան լինի: Ավելի շատ դեպի վերացական արվեստի դաշտ եմ մտել, աբստրակտ գործեր են ցուցադրվելու: Փորձում եմ նոր պատուհան բացել, ավելի շատ դեպի ներս գնալ, ինքս ինձ մոտենալ»,- ասաց նկարչուհին` հավելելով, որ ցուցադրվելու են իր` 50-ից ավելի աշխատանքներ:

Ըստ նրա` ցուցադրության միջոցով ուզում է տեսնել իր 2 տարիների աշխատանքը, քանի որ արվեստանոցում դրանք դրված են լինում իրար վրա, և այդպես էլ ամբողջական աշխատանքի արդյունքը չես տեսնում. «Սա, կարծես, երկխոսություն լինի ինքս ինձ հետ»: