Շրջանառության մեջ կդրվեն նոր՝ ավելի ամուր փակցվող, բարակ և անվտանգ դրոշմապիտակներ. Անանյան

Առաջիկայում շրջանառության մեջ կդրվեն նոր դրոշմապիտակներ: Կառավարության նիստում ՊԵԿ նախագահ  Դավիթ Անանյանը տեղեկացրեց, որ արդեն հայտնի է դրոշմապիտակի արտադրության հաղթողը, մրցույթը տեղի է ունեցել երկու օր առաջ:

Ըստ նրա` տեխնիկական պահանջն է փոխվել` դրոշմապիտակն ավելի ամուր է փակցվելու և լինելու է ավելի բարակ: 

«Մենք լուծումը տվել ենք այսպես՝ հաստությունը 50 միկրոնից իջեցնում ենք 36 միկրոնի, և այն լինելու է ավելի դժվար պոկվող:  Մատակարարի հետ հաջորդ շաբաթ հանդիպելու ենք և առաջարկելու, որ, բացի այս տեխնիկական փոփոխություններից, նա այլընտրանքային մի քանի առաջարկներ ներկայացնի, որից կընտրենք ամենաօպտիմալ տարբերակը, որը մեզ զերծ կպահի տխրահռչակ բաներից»,- ասաց ՊԵԿ նախագահը:

ՀՀ փոխվարչապետ Տիգրան Ավինյանը հավելեց՝ կարևորն այն է, որ այս դրոշմապիտակներն անվտանգ են, մասնավորապես՝ երեխաների համար: «Եթե երեխան նույնիսկ կուլ է տալիս դրոշմապիտակը, այն որևէ վտանգ չի ներկայացնում»,- ընդգծեց նա:

Իր հերթին, ՀՀ առողջապահության նախարար Արսեն Թորոսյանը նշեց, որ այս փաստն իսկապես կարևոր է: «Շատ ահազանգեր էին լինում թե' բժշկական հանրության կողմից, որոնք շնչուղիներից, կոկորդից հանում էին, և թե' ծնողների կողմից: Եթե շատ խորանանք թեմայի մեջ, ապա կյանքի որակը բարելավելու առումով շատ լուրջ է: Այո, պետք է զբաղվել նման հարցերով»,- նշեց նախարարը: