Քննչական մարմինները հայտնում են մեր դիրքորոշումը. առողջապահության նախարարը` Մայրապետյանի` արտերկրում բուժվելու մասին

Սամվել Մայրապետյանի գործով առողջապահության նախարարությունը համագործակցում է ՄԻԵԴ-ում Հայաստանի ներկայացուցչի, դատախազության և այդ գործը քննող Հատուկ քննչական ծառայության հետ և տվել է իր մասնագիտական եզրակացությունը վերոնշյալ մարմիններին: Այս մասին լրագրողների հետ հանդիպման ժամանակ հայտնեց ՀՀ առողջապահության նախարար Արսեն Թորոսյանը:

«Ես վստահ չեմ, որ հիմա կարող եմ բժշկական գաղտնիք բացահայտել, բայց այն դիրքորոշումը, որը հայտնում են քննչական մարմինները, ներառում է մեր դիրքորոշումը, հետևաբար` նրանց ասածը կարդալիս դուք կարող եք հաշվի առնել, որ մենք մեր կարծիքը տվել ենք նրանց: Ավելին չեմ կարող ասել, որովհետև բժշկական գաղտնիք է պարունակում»,- ասաց նա:

Հարցին՝ Սամվել Մայրապետյանը կարո՞ղ է Հայաստանում տրանսլումինալ դրենավորման ենթարկվել, քանի որ մասնագետները կարծիք են հայտնել, որ այն մեր երկրում չի կիրառվում, Թորոսյանն արձագանքեց. «Իսկ դուք վստա՞հ եք, որ նրան այդ մեթոդն է ցուցված հիմա: Կրկնում եմ՝ մեր դիրքորոշումը հայտնել ենք, քննչական մարմինները և դատախազությունը, պատասխանելով ՄԻԵԴ-ին և փաստաբանական խմբին, հիմնվում են նաև մեր կարծիքի վրա»: