Առողջապահության նախարարը Համաշխարհային բանկի ներկայացուցիչների հետ քննարկել է առողջապահության ոլորտում առկա խնդիրները

Համաշխարհային բանկի  առողջապահական թիմի ղեկավար, առողջապահության գլխավոր մասնագետ Սուսաննա Հայրապետյանի և «Հայաստանում արդյունավետ և ներառական համընդհանուր առողջապահական ծածկույթի (ՀԱԾ) ապահովման» առաջադրանքի թիմի ղեկավար, առողջապահության ոլորտի տնտեսագետ Ռուզել Ֆ. Լավադոնի հետ հանդիպման ընթացքում ՀՀ առողջապահության նախարար Լևոն Ալթունյանին ամփոփ ներկայացվել են 1997 թվականից ի վեր դոնոր կազմակերպության կողմից Հայաստանում իրականացված ծրագրերը։
Ինչպես հայտնում են ՀՀ առողջապահության նախարարության տեղեկատվության և հասարակայնության հետ կապերի վարչությունից, Սուսաննա Հայրապետյանը կարևորել է, որ այդ ծրագրերը համահունչ են եղել երկրի կարիքներին և կառավարության գերակա ուղղություններին։
Համաշխարհային բանկը, համաձայնագիր կնքելով պետության հետ, ծրագրերի շրջանակում ծախսվող գումարների և իրականացվող աշխատանքների որակի նկատմամբ  խիստ վերահսկողություն է իրականացնում։ Բազմաբնույթ ուղղություններից նշվել են ինչպես գյուղական բնակավայրերում առաջնային օղակի զարգացման և ընտանեկան բժշկի ինստիտուտի ներդրման, այնպես էլ` մարզային հիվանդանոցային համակարգի օպտիմալացման և արդիականացման  ծրագրերը։

Դրանց զուգահեռ իրականացվել են ոչ պակաս կաևորության ինստիտուցիոնալ և կառավարման ոլորտի բարեփոխումներ, ներդրվել են ֆինանսավորման նոր մեխանիզմներ և այն։
Հանդիպման ընթացքում կարևորվել է իրականացված ծրագրերի գնահատման, դրանց արդյունավետության չափման շարունակականության ապահովումը։  Այս առումով շոշափելի են նաև սկրինինգային ծրագրերի սպասվելիք արդյունքները։ Սուսաննա Հայրապետյանը բարձր է գնահատել ՀՀ ԱՆ Առողջապահական ծրագրերի իրականացման գրասենյակի թիմի կողմից կատարված աշխատանքները։
Համաշխարհային բանկի ներկայացուցիչների հետ նաև քննարկվել են առողջապահության ոլորտում առկա խնդիրները, առաջիկա անելիքները։  
Սուսաննա Հայրապետյանը հայտնել է համակարգի համընդհանուր գնահատման, ինչպես նաև առանձին ուղղություններով գրանտային միջոցներով առաջնահերթ ծրագրեր իրականացնելու  Համաշխարհային բանկի պատրաստակամությունը։  Պայմանավորվածություն է ձեռք բերվել  առաջակույում առավել մանրամասն քննարկել համագործակցության եզրերը։