Պեկինը մտադիր է ընդլայնել Թեհրանի հետ հարաբերությունները. Չինաստանի ԱԳ փոխնախարար

Պեկինը մտադիր է ամենատարբեր ասպարեզներում, մասնավորապես` առեւտրա-տնտեսական ոլորտում ընդլայնել Թեհրանի հետ հարաբերությունները: Այդ մասին ԻՌՆԱ-ի հետ զրույցում ասել է Չինաստանի ԱԳ փոխնախարար Ժանգ Ջունը՝ հավելելով, որ պաշտոնական Պեկինը ցանկացած դեպքում պաշտպանելու է երկկողմ հարաբերությունները:

«Տնտեսական ոլորտը Չինաստանի եւ Իրանի միջեւ հարաբերությունների կարեւորագույն ասպարեզներից է, եւ Պեկինն ու Թեհրանը  մեծ ու վստահելի առեւտրային գործընկերներ են»,- նշել է չինացի բարձրաստիճան դիվանագետը՝ հավելելով, որ Չինաստանը փորձում է ամենատարբեր ոլորտներում ընդլայնել եւ ամրապնդել Իրանի հետ հարաբերությունները:

Անդրադառնալով Իրանի դեմ ԱՄՆ պատժամիջոցներին՝ Ժանգ Ջունն ընդգծել է, որ պաշտոնական Պեկինի համար չափազանց կարեւոր է տարբեր երկրների հետ առեւտրա-տնտեսական հարաբերությունների համար կայուն ու ապահով միջավայրի առկայությունը եւ հենց այդ պատճառով էլ փորձում է պաշտպանել Իրանի շահերը` ապահովելով չինական ընկերությունների ակտիվ ներգրավվածությունն իրանական շուկայում: