Սիրով ընդունել եմ այս առաջարկը. Հունան Պողոսյան

Այսօր կառավարության նիստի օրակարգում է ՀՀ նախկին փոխոստիկանապետ Հունան Պողոսյանին Սյունիքի մարզպետ նշանակելու հարցը: Նախքան կառավարության նիստի մեկնարկը մարզպետի թեկնածուն լրագրողների հետ զրույցում հայտարարեց, որ նոր Հայաստանի կողմնակից է: «Ամեն ինչ անելու եմ, որ այդ նոր Հայաստանում լավ լինի»,- ասաց նա:

Ինչ վերաբերում է դիտարկումներին, որ նա երկար տարիներ ծառայել է նախկին իշխանություններին, Հունան Պողոսյանը պատասխանեց, որ,  ծառայելով օրենքին, միշտ ժողովրդին է ծառայել։

Նա հայտնեց, որ մարզպետի պաշտոնում նշանակվելու առաջարկը կառավարությունից է ստացել: «Ես նախկին պաշտոնում 8 տարի ծառայել եմ, ինձ կարճ դադար էր պետք, իսկ հիմա սիրով ընդունել եմ այս առաջարկը»,- ասաց Պողոսյանը` հավելելով, որ մարզում առաջնային խնդիրներից է լինելու փոխվստահության մթնոլորտի ձեւավորումը։

Հիշեցնենք՝ Հունան Պողոսյանը ոստիկանության պետի առաջին տեղակալի պաշտոնից հաժարականի դիմում էր ներկայացրել մայիսի 11-ին։