Դատարանների միջոցով կփորձենք լուծարել պայմանագրերը. Հայկ Մարությանը՝ կառուցապատման մասին

Չպետք է օրենքները մի կողմ թողնենք ու ասենք՝ մեր ուզածով ենք անում այսուհետ ամեն ինչ. լրագրողների հետ զրույցում ասաց Երևանի քաղաքապետ Հայկ Մարությանը՝ խոսելով Երևանի կառուցապատման մասին:

Նրա խոսքով՝ եթե կան օրենքի խախտումներ, կոռուպցիոն տարրեր, դատարանների միջոցով պետք է փորձեն լուծարել պայմանագրերը: «Ամեն ինչը պետք է լինի օրենքի սահմաններում: Կլինեն դեպքեր, որ արդեն իսկ պայմանագրեր կնքած կլինեն, և ինչ-որ տեղ պետք է հաշտվենք դրա հետ, բայց միևնույն ժամանակ նոր պայմաններ պետք է թելադրենք: Եթե կան շինություններ, որոնք չեն համապատասխանում հանրային ընկալմանը, դրանց պայմանագրերը կուսումնասիրվեն: Այսօրվանից սկսած՝ ոչ մի շինություն չի լինելու, որը չհամապատասխանի հանրային պահանջներին»,- ասաց Մարությանը:

Yerkir.am-ի հարցին, թե կիսակառույցների ճակատագիրն ի՞նչ է լինելու՝ ժամանակավորապես դադարեցվելո՞ւ են աշխատանքները՝ մինչև պայմանագրերի ուսումնասիրությունը, թե՞ շինարարական աշխատանքներին զուգահեռ է լինելու պայմանագրերի ուսումնասիրությունը, Մարությանը պատասխանեց. «Եթե օրենքը թույլ է տալիս դադարեցնել, մենք կդադարեցնենք, եթե՝ ոչ, ապա նրանք կշարունակեն աշխատանքները՝  մինչև մենք կուսումնասիրենք»: