Կփորձենք զարմացնել հայ հանդիսատեսին. Եվգենի Պլյուշչենկո

Օլիմպիական խաղերի կրկնակի, աշխարհի առաջնության եռակի, Եվրոպայի առաջնության բազմակի չեմպիոն Եվգենի Պլյուշչենկոն մեծ ակնկալիքներ ունի Երևանում կայանալիք «Սառույցի թագավորներ» շոու-ծրագրից:

«Դեռևս 2008 թվականին Հայաստանում ունեցել եմ ցուցադրական 2 ելույթ, որոնք մեծ արձագանք գտան այստեղ: Հիմա դադար եմ վերցրել մարզական մրցաշարերից և բաց կթողնեմ այս մրցաշրջանը: Փոխարենը համաշխարհային շրջագայության եմ մասնակցում, որն արդեն մեկնարկել է: Երևանում հաջորդ ամիս կայանալիք ներկայացման ժամանակ ձեզ կներկայանամ նոր շոու-ծրագրով: Կփորձենք զարմացնել հայ հանդիսատեսին և հասկանալ նրանց արձագանքը: Ինձ հետ ամեն ինչ կարգին է: ԶԼՄ-ներում լուրեր էին շրջանառվում, որ Պլյուշչենկոն կրկին կվիրահատվի, բայց ես լավ եմ, ամեն ինչ կարգին է: Շարունակում եմ մարզվել»:

«Ես մեծ ցանկություն ունեմ մասնակցելու հաջորդ օլիմպիական խաղերին, առաջին հերթին` ինքս ինձ ապացուցելու համար, որ դա հնարավոր է անել (2018 թվականի օլիմպիական խաղերի Պլյուշչենկոյի համար կլինեն 5-րդը): Իհարկե, սարսափելի դժվար կլինի, բայց` ինչո՞ւ ոչ: Հուսեյն Բոլտը, Մայքլ Ֆելպսը, Ելենա Իսինբաևան յուրօրինակ են, ես ևս կփորձեմ ինչ-որ չափով նրանց հասնել»:

«Ցավոք, Հայաստանում չկան գեղասահքի համար նախատեսված սահադաշտեր: Մենք ժամանակին փորձեցինք Պլյուշչենկոյի անվան մարզադպրոց բացել այստեղ, սակայն եթե տարվա մեջ միայն մեկ ամիս կարող ես սահել այդ սառույցի վրա, ապա երեխան չի կարող մարզվել: Հայաստանը ժամանակին լավ մարզիկներ ուներ, օրինակ` իմ մենեջեր Արի Զաքարյանը: Պարզապես ղեկավար այրերը պետք է աջակցություն ցուցաբերեն մարզաձևի զարգացմանը: Միայն ֆուտբոլ և շախմատ խաղալով` պետք չէ սահմանափակվել»:

«Ես շատ ընկերներ ունեմ Երևանում: Նոյեմբերին կայանալիք շոու-ծրագրից հետո կշրջենք երկրով մեկ: Նախորդ այցի ժամանակ մենք եղել ենք Հայոց ցեղասպանության զոհերի հիշատակը հավերժացնող հուշահամալիրում: Դուք հրաշալի կառույցներ ունեք, ինչպիսին Մարզահամերգային համալիրն է: Դեռևս 2008-ին, երբ եղա Հայաստանում, շոու-ծրագրում համար ունեի «Իմ Հայաստան» երգի ուղեկցությամբ, որն, ի դեպ, իմ սիրելի երգն է: Ես այն իմ «Այփադ»-ում (Ipad) ունեմ»: 

ՀԱՕԿ պաշտոնական կայքից տեղեկանում ենք, որ «Սառույցի թագավորները» շոու-ծրագիրը կկայանա նոյեմբերի 20-ին Մարզահամերգային համալիրում: Բացի Պլյուշենկոյից, ծրագրում հանդես կգան նաև էստրադային ջութակահար Էդգար Հակոբյանը, Տիգրան Պետրոսյանը, ակրոբատ Սերգեյ Յակիմենկոն և հայ գեղասահորդներ աշխարհի տարբեր երկրներից: