Ես իրավունք ունեմ այստեղ 4-րդ անգամ ընտրվելու, որը չեմ անի. ԵՊՀ ռեկտորը՝ իր պաշտոնի մասին

Լրագրողների հետ զրույցում ԵՊՀ ռեկտոր Արամ Սիմոնյանը նշեց, որ չի պատրաստվում հրաժարական տալ զուտ այն պատճառով, որ իր դեմ ճնշում են գործադրում և պահանջում իր հրաժարականը:

Yerkir.am-ը հետաքրքրվեց ռեկտորից՝ իր պաշտոնավարման 12 տարիների ընթացքում իրեն փոխարինող պատրաստե՞լ է: Սիմոնյանը պատասխանեց. «Պրոռեկտորները, գիտքարտուղարը, վարչության պետերը: Շատ եմ պատրաստել: Երիտասարդներ շատ կան համալսարանում, գնացեք, տեսեք: Այո, միշտ չի հաջողվել, բայց…»:

Մեր հարցին, թե տեսնո՞ւմ է նրանց ռեկտորի պաշտոնում, պատասխանեց. «Այո, տեսնում եմ: Նրանցից յուրաքանչյուրը կարող է աշխատել»:

Մեր հաջորդ հարցին, թե որքա՞ն ժամանակ է իրեն տեսնում այդ պաշտոնում, Սիմոնյանը պատասխանեց, որ չի կարող ասել: «Չգիտեմ: Համենայն դեպս, չեմ պատրաստվում այստեղ երկար մնալ: Ես իրավունք ունեմ այստեղ 4-րդ անգամ ընտրվելու, որը չեմ անի»,- ասաց նա:

Նշենք, որ ռեկտորի պաշտոնավարման երրորդ ժամկետը կլրանա 2020 թվականին: