Վարկերի սառեցման մասին երբևիցե չի խոսվել. Ջավադյան

Հայաստանի Կենտրոնական բանկի նախագահ Արթուր Ջավադյանն անդրադարձել է գյուղատնտեսական վարկերի տույժ-տուգանքները վերացնելու մեխանիզմներ առաջարկելու վերաբերյալ` վարչապետ Նիկոլ Փաշինյանի հանձնարարականին:

«Վարկերի սառեցման մասին երբևիցե չի խոսվել»,- խորհրդարանում լրագրողների հետ զրույցում նշեց Ջավադյանը:  

Նրա խոսքով` այս պահին կառավարության հետ համատեղ գործընթացներ են իրականացնում: «Դրա համար որոշակի օրենսդրական փոփոխություններ պետք է իրականացվեն: Վարչապետն արդեն հանձնարարականներ տվել է համապատասխան մարմիններին: Շատ արագ կտեսնեք արձագանքը: Կլինեն օրենսդրական բարեփոխումներ, որոնց արդյունքում այդ տույժ-տուգանքները կվերանան»,- հայտնեց Ջավադյանը:

Նա հիշեցրեց, որ վարչապետը խոսել է նաև բյուջետային տարբեր մեխանիզմների միջոցով գյուղատնտեսության ոլորտին աջակցելու մասին` ընդգծելով, որ խոսքը սուբսիդավորման մասին է: «Վարչապետը նաև ասաց, որ հնարավոր է ստեղծել նոր իրավիճակ` ավելի շատ հարկեր հավաքել և դրա հաշվին գյուղացիների վրա եղած բեռը թեթևացնել»,- ասաց ԿԲ նախագահը:

Հիշեցնենք, որ վարչապետ Նիկոլ Փաշինյանը կառավարության վերջին նիստում անդրադարձավ գյուղատնտեսական վարկերի տույժ-տուգանքները վերացնելու հարցին` ընդգծելով, որ հարցը քննարկել է ԿԲ նախագահի հետ և հանձնարարել դրանք վերացնելու մեխանիզմներ առաջարկել: