Եթե չքվեարկեն որոշ պատգամավորներ, ո՞նց պետք է անցնի. Վահրամ Բաղդասարյան

ՀՀԿ խմբակցության ղեկավար Վահրամ Բաղդասարյանը խորհրդարանում լրագրողներին հայտնեց, որ մայիսի 8-ին վարչապետ ընտրելիս ՀՀԿ-ն միասնական է քվեարկելու:

Հիշեցնենք, որ միակ թեկնածուն ԱԺ պատգամավորների 1/3-ի կողմից առաջադրված` «Ելք» խմբակցության ղեկավար Նիկոլ Փաշինյանն է:

Դիտարկմանը` նախկինում էլ ՀՀԿ-ն նման դիրքորոշում հայտնեց, բայց դեմ քվեարկեց Փաշինյանի թեկնածությանը, Բաղդասարյան պատասխանեց. «Նախկինում մենք ասել ենք քվեարկության կայացման մասին, իսկ հիմա ասում ենք, որ կօժանդակենք քվեարկությանը»:

Հարցին՝ դա նշանակո՞ւմ է, որ որոշ ՀՀԿ-ականներ կողմ կքվեարկեն Նիկոլ Փաշինյանի թեկնածությանը, նա պատասխանեց. «Եթե չքվեարկեն` ո՞նց պետք է անցնի»:

Ինչ վերաբերում է հարցին՝ նշանակում է` ՀՀԿ ազա՞տ է լինելու քվեարկության ժամանակ, Բաղդասարյանը հորդորեց թույլ տալ, որ իրենց խմբակցությունը որոշի: