Ճանապարհին զանգեցին ոստիկաններից մեկին` տվեցին իմ անունը. լրագրողն` իր հետ կատարվածի մասին

Այսօր Երևան-Աբովյան ավտոճանապարհից ոստիկանները բռնի կերպով լրագրող Տիրայր Մուրադյանին նստեցրել են ավտոմեքենան և տեղափոխել անհայտ ուղղությամբ: Yerkir.am-ի հետ զրույցում ոստիկանությունից հայտնեցին, որ լրագրողին բերման չեն ենթարկել, այլ մեքենայով մի քանի մետր այն կողմ են տեղափոխել: «Այս պահին ոստիկանության ծառայողները զրուցում են նրա հետ»,- ասացին մեզ:

Իսկ Տիրայր Մուրադյանը Yerkir.am-ին  հայտնեց, որ իրեն մեքենա են նստեցրել իր մասնագիտական պարտականությունները կատարելիս: «Մեքենայի մեջ գոռում էի, ասում, որ լրագրող եմ, բայց բաց չէին թողնում: Ճանապարհին զանգեցին ոստիկաններից մեկին, ասացին իմ անունը, հավանաբար հանձնարարեցին բաց թողնել, և նրանք ինձ նստեցրեցին տաքսին, հետ ուղարկեցին»,- ասաց լրագրողը:

Հիշեցնենք, որ երեկ էլ կառավարության 3-րդ մասնաշենքի մոտ էր Մուրադյանը ենթարկվել բռնության: