Իսկ տեսակետ չկա՞, որ Ֆարմանյանն է այս ամենի հեղինակը. ՀՀԿ-ական պատգամավորը՝ Սուրիկ Խաչատրյանի հետ կատարվածի մասին

ՀՀԿ-ական պատգամավոր Սամվել Ֆարմանյանը, անդրադառնալով Սյունիքի մարզպետ Սուրիկ Խաչատրյանի դեմ կատարված մահափորձին, նշեց, որ այդ դեպքի կապակցությամբ որևէ տեսակետ չի կարող ասել, քանի որ համոզված է` իրավապահ մարմինները կանեն իրենց գործը:

Խոսելով Սուրիկ Խաչատրյանի մեքենայի ուղղությամբ արձակած կրակոցների և որևէ մեկի` գոնե աննշան վնասվածք չստանալու մասին, Ֆարմանյանը նշեց, որ իր մասնագիտությունը այնպիսին չէ, որ ինքը կարողանա այդ առնչությամբ մեկնաբանություններ անել: «Շնորհակալ եմ, որ ինձ նման ունակություններ եք վերագրում, բայց չեմ կարող կոնկրետ բան ասել և մեկնաբանել»,- ասաց նա:

Երբ պատգամավորին լրագրողները տեղեկացրեցին, որ իր գործընկերների շրջանում տեսակետ կա, թե Զարուհի Փոստանջյանն է Սուրիկ Խաչատրյանի դեմ մահափորձի հեղինակը, Ֆարմանյանը պատասխանեց. «Իսկ տեսակետ չկա՞, որ Չեբուրաշկան է այս ամենի հեղինակը»:

Երբ նշեցինք` մի՞թե կարելի է Զարուհի Փոստանջյանին և Չեբուրաշկային համեմատել, նա հորդորեց ինտրիգներ չփնտրել: «Լավ, կամ էլ այսպես` տեսակետ չկա՞, արդյոք, որ Սամվել Ֆարմանյանն է այդ դեպքերի հեղինակը»,- խոսքը փորձեց խմբագրել ՀՀԿ-ական պատգամավորը: