Սոցիալական ծառայություններ տրամադրող 24 կենտրոններին Երևանում տարածք կհատկացվի

Կառավարության նիստի օրակարգում է մի որոշում, ըստ որի` «ՀՀ գյուղնախարարության աշխատակազմ» պետական կառավարչական հիմնարկին ամրացված` Երևան քաղաքի Մամիկոնյանց 39ա հասցեում գտնվող շենքից 1-ին հարկի 216.6 քառ. մետր մակերեսով, 2-րդ հարկի 287.6 քառ. մետր մակերեսով, 7-րդ հարկի 312.0 քառ. մետր մակերեսով և 8-րդ հարկի 50.45 քառ. մետր մակերեսով, 8251,37 հազ. դրամ սկզբնական արժեքով տարածքները հետ են վերցվում և ամրացվում «ՀՀ աշխատանքի և սոցիալական հարցերի նախարարության աշխատակազմ» պետական կառավարչական հիմնարկին:

ՀՀ աշխատանքի և սոցիալական հարցերի նախարարությունը, 866.65քառ. մետր տարածք ստանալով, պարտավորվում է Մամիկոնյանց 39ա հասցեում գտնվող մասնաշենքի 6-րդ հարկի 272.7 քառ. մետր մակերեսով տարածքը կապիտալ վերանորոգել իր սեփական միջոցների հաշվին՝ ՀՀ գյուղատնտեսության նախարարության աշխատակիցների տեղափոխման նպատակով:

ՀՀ կառավարության որոշման նախագծի ընդունմամբ հնարավորություն կտրվի ՀՀ աշխատանքի և սոցիալական հարցերի նախարարությանը իրականացնելու համալիր սոցիալական ծառայություններ (այդ թվում` խոշորացված համայնքներում նաև համայնքային ծառայություններ) տրամադրող 24 կենտրոնների կազմակերպման նպատակով անհրաժեշտ տարածքների հատկացմանը:

Որոշման նախագծի ընդունմամբ հնարավորություն կտրվի ՀՀ աշխատանքի և սոցիալական հարցերի նախարարության սոցիալական ապահովության պետական ծառայության աշխատանքի առավել արդյունավետ կազմակերպման, վերապահված վերահսկողական գործառույթների համակարգված, արագ և օպերատիվ իրականացման համար: