ՌԴ ԶՈւ–ն հարվածել է Ուկրաինայի վառելիքաէներգետիկ օբյեկտներին և լոգիստիկ կենտրոններին. ՊՆ

Ռուսաստանի Դաշնության զինված ուժերը անցած մեկ օրում հարվածներ են հասցրել Ուկրաինայի ԶՈւ-ի շահերի համար օգտագործվող վառելիքաէներգետիկ և տրանսպորտային ենթակառուցվածքների օբյեկտներին, ինչպես նաև լոգիստիկ կենտրոններին։ Այս մասին հայտնում է ռուսական ռազմական գերատեսչությունը։

​«Ռուսաստանի Դաշնության զինված ուժերի զորախմբերի օպերատիվ-տակտիկական ավիացիան, հարվածային անօդաչու թռչող սարքերը, հրթիռային զորքերն ու հրետանին հարված են հասցրել Ուկրաինայի ԶՈւ-ի շահերի համար օգտագործվող վառելիքաէներգետիկ և տրանսպորտային ենթակառուցվածքների օբյեկտներին, լոգիստիկ կենտրոններին»,-ասվում է հաղորդագրության մեջ։

Բացի այդ, 155 շրջաններում խոցվել են հարվածային ԱԹՍ-ների պահման վայրերը, ինչպես նաև ուկրաինական զինված կազմավորումների և օտարերկրյա վարձկանների ժամանակավոր տեղակայման կետերը։

​Հաղորդվում է նաև, որ Ռուսաստանի Սևծովյան նավատորմի ծովային ավիացիան Սև ծովում ոչնչացրել է Ուկրաինայի ԶՈւ-ի ծովային դրոնը։

ՌԴ պաշտպանության նախարարության հաղորդմամբ` ​ՀՕՊ ուժերը մեկ օրում ոչնչացրել են 1 155 անօդաչու թռչող սարք, 20 ավիացիոն ռումբ և Ուկրաինայի ԶՈւ-ի HIMARS ռեակտիվ արկ։