Փող ունես, նավթ ունես, հանգիստ նստիր տեղդ. Էրդողանը՝ Բարզանիին

Թուրքիայի նախագահ Ռեջեփ Թայիփ Էրդողանի՝ Քուրդիստանի անկախության հանրաքվեի հարցով վրդովմունքը չի մարում: Այսօր նա դարձյալ անդրադարձել է այդ խնդրին՝ հայտարարելով, որ «Բարզանիի ղեկավարությունն ինքն իրեն գցել է կրակը»:

Ինչպես տեղեկացնում է Aydinlik-ը, Էրդողանը քննադատել է Իրաքյան Քուրդիստանի ղեկավար Մասուդ Բարզանիին` անկախության վերաբերյալ հարցը հարևանների ու Բաղդադի հետ չքննարկելու համար։ «Դու մեզ հետ խոսեցի՞ր, Իրանի հետ խոսեցի՞ր, դաշնային պետության հետ խոսեցի՞ր: Ինչպե՞ս ես այսպիսի քայլ կատարում», - ասել է նա:

«Հյուսիսային Իրաքում նստած՝ ամեն ինչ ունես` փող ունես, նավթ ունես, հանգիստ նստիր տեղդ»,- դիմել է նա Բարզանիին: