Կանադայում Հայ Դատի հանձնախումբը պատգամավորների հետ քննարկել է Արցախյան հիմնահարցը

Նախորդ շաբաթվա ընթացքում Կանադայի Հայ Դատի հանձնախումբը շարունակել է իր հերթական հանդիպումները մայրաքաղաք Օտտավայում, որտեղ հանդիպումներ է ունեցել պատգամավորներ Թոնի Քլեմենթիի, Ռեյչլ Հարդրի, Ջին Եիփի և Ալեքսանդր Պուլրիսի հետ:

Ըստ Horizonweekly-ի՝ հանդիպումների ընթացքում կողմերը քննարկել են Հայ Դատի հանձնախմբի նախաձեռնած առաջիկա ծրագրերը, միջմշակութային հարաբերություններն ու բազմամշակութային հարցերին վերաբերող այլ թեմաներ: Հայ Դատի պատվիրակները պատգամավորների հետ քննարկել են նաև Կանադա-Հայաստան հարաբերությունների ոլորտը, Արցախյան հիմնահարցն ու Հայ Դատին առնչվող մի շարք առաջնահերթ հարցեր:

Կողմերը հաստատել են վերոնշյալ բոլոր հարցերի նկատմամբ կառուցողական քայլերի դիմելու, ինչպես նաև հետևողական և մշտական երկխոսություն շարունակելու անհրաժեշտությունը:

Պատգամավորներն իրենց հերթին գովաբանել են Հայ Դատի հանձնախմբի աշխատանքները՝ վերահաստատելով իրենց աջակցությունը կանադահայության և Հայ Դատի աշխատանքներին: