ԱՄՆ Հայ Դատի հանձնախումբը կոնգրեսականի հետ քննարկել է ԱՄՆ-Հայաստան հարկային նոր համաձայնագրի հարցը

Ամերիկայի Հայ Դատի հանձնախմբի ղեկավարներն ու համակիրները Լոս Անջելեսում հանդիպում են ունեցել կոնգրեսական Բրեդ Շըրմանի հետ` քննարկելու ԱՄՆ-ի և Հայաստանի միջև հարկային նոր համաձայնագիրը:

Ըստ Asbarez-ի` նշյալ քննարկմանը ներկա են եղել ԱՄՆ Հայ Դատի հանձնախմբի ատենապետ Րաֆֆի Համբարյանը, Արևմտյան ԱՄՆ-ի Հայ Դատի հանձնախմբի ատենապետ Նորա Հովսեփյանն ու Հայաստանի «Մարիոթ» հյուրանողի ներդրողներից Բեգլար Փիլավճյանը:

Համբարյանը շնորհակալություն է հայտնել համաձայնագրի վերջնականացման հարցով կոնգրեսականի տարած կարևոր աշխատանքի համար, որի գլխավոր նպատակն է վերացնել երկկողմանի առևտրի ու ներդրումների առաջ դրված արհեստական արգելքները:

Համբարյանը նաև հույս է հայտնել, որ Հայաստանի իրադարձությունների նկատմամբ Սպիտակ տան և ԱԳՆ-ի ջերմ խոսքերը կառաջնորդեն հատկանշական քայլերի` իրենց երկրորդ դարը թևակոխող Հայաստան-ԱՄՆ հարաբերություններում: