Կառավարությունը նախատեսում է շարունակել «Մաքուր Հայաստան» ծրագիրը

Այսօր կառավարության նիստում վարչապետ Կարեն Կարապետյանը հանձնարարական տվեց «Մաքուր Հայաստան» ծրագրի շարունակության վերաբերյալ: Վարչապետի խոսքով` 2017թ. փետրվարին մեկնարկեց «Մաքուր Հայաստան» ծրագիրը: Կատարված աշխատանքների արդյունքում, 2018թ. մարտի դրությամբ, 2031 աղբանոցներից մաքրվել է 1622-ը, փակման է ենթակա 108-ը: Բոլոր մարզերում ստեղծվել են համապատասխան հանձնաժողովներ ու աշխատանքային խմբեր, գործադիրում նշանակվել են «Մաքուր Հայաստան» ծրագրի պատասխանատուներ:

Դեռևս կան խնդիրներ, որոնք վերացնելու նպատակով վարչապետը հանձնարարեց տարածքային կառավարման և զարգացման նախարարին, մարզպետերին ու համայնքների ղեկավարներին` 10-օրյա ժամկետում մշակել «Մաքուր Հայաստան»-ի նոր գործողությունների ծրագիր` սահմանելով հստակ ժամանակացույց:

Վարչապետը շեշտեց, որ աղբահանության պայմանագրերի կնքումը պետք է ավարտել մինչև հունիսի 1-ը: Վարչապետը հանձնարարեց մշակել առնվազն 4 շաբաթօրյակների աշխատանքային գրաֆիկ: