Արագածոտնի մարզում հայտարարված է գարնանային սանիտարական միամսյակ

Արագածոտնի մարզպետ Աշոտ Սիմոնյանի հանձնարարականով մարզում հայտարարված է գարնանային սանիտարական միամսյակ: Ընդգրկված լինելով «Մաքուր Հայաստան» ծրագրի շրջանակում` միամսյակի նպատակն է բարելավել մարզի բնակավայրերի սանիտարական վիճակը, բարեկարգել հասարակական վայրերը, շրջակա միջավայրը մաքրել համայնքներում ձմռան ժամանակ կուտակված կենցաղային աղբից:

Նկատի ունենալով մարզի բնակլիմայական պայմանները` սանիտարական միամսյակը անց է կացվելու երկու փուլով: Նախալեռնային գոտում գտնվող համայնքներում այն կայանալու է մարտ ամսին, իսկ բարձր լեռնային բնակավայրերի համայնքներում միամսյակը կիրականացվի   ապրիլ ամսին:

Սանիտարական միամսյակի աշխատանքներին մասնակից կլինեն դպրոցականները, հասարակական, ձեռնարկատիրական կազմակերպությունները  եւ ողջ հասարակությունը: Համատեղ ուժերով կմաքրվեն համայնքների փողոցները, մայթերը, հասարակական վայրերը եւ հուշարձանները: Հասարակական վայրերում նախատեսվում է իրականացնել նաեւ ծառատնկման եւ կանաչապատման աշխատանքներ:

Սանիտարական միամսյակի աշխատանքները  համակարգում է  մարզպետի հանձնարարությամբ ստեղծված հանձնաժողովը, որը ղեկավարում է մարզպետի տեղակալ Մուշեղ Աբգարյանը:  Միաժամանակ համայնքներում միամսյակի գործընթացը վերահսկում են մարզպետարանի աշխատակիցները, ովքեր պատասխանատվություն են կրում իրենց ամրացված համայնքների սանիտարական մաքրման համար:

ՀՀ Արագածոտնի մարզպետարանի տեղեկատվությոն եւ հասարակայնության հետ կապերի բաժին