Սանիտարական հատումներ` Սիրահարների այգում

Մարշալ Բաղրամյան պողոտայում գտնվող Սիրահարների այգում մոտակա ամիսների ընթացքում ամբողջությամբ կհատվի 7 ծառ, իսկ 8 ծառ` մասնակի. տեղեկացնում է «Էկոլուրը»:

Ինչպես նշված է այգու մուտքի մոտ փակցված ցուցանակում, սանիտարական հատումների պատճառն այգու կանաչապատ տարածքների պահպանությունն ու զարգացումն է: Հատվող ծառերը համարակալված են` կապույտ գույնով` մասամբ հատվող ծառերը, իսկ կարմիր գույնով` ամբողջությամբ հատվող ծառերը:

Ինչպես տեղեկացնում է Սիրահարների այգու տնօրինությունը, այս տարվա գարնանն այգում տնկվել է  տարբեր տեսակի 70 ծառ, թվով 50-ը նախատեսվում է տնկել նոյեմբեր ամսին:

Տնօրինությունը պատրաստ է ընդունել դիտողություններ եւ առաջարկություններ: Սա Երեւանում առաջին դեպքն է, երբ բոլորը կարող են համոզվել, թե կոնկրետ որ ծառերն են ենթակա սանիտարական հատման: