Վարչապետը հանձնարարեց բարեկարգել օդանավակայաններից Երևան և Գյումրի տանող ճանապարհները

Այսօր կառավարության նիստում վարչապետ Կարեն Կարապետյանը հանձնարարական տվեց քաղաքների մուտքի և ելքի ճանապարհների, ճարտարապետական լուծումների կանոնակարգման և միջավայրերի բարեկարգման հարցերի վերաբերյալ: Վարչապետի խոսքով` հաշվի առնելով այս տարվա երեք խոշոր իրադարձությունները և զբոսաշրջային այցերը, հարկավոր է սեղմ ժամկետներում կատարել բարեկարգման աշխատանքներ:

Նա ֆինանսների նախարարին, քաղաքաշինության պետական կոմիտեի նախագահին հանձնարարեց մեկամսյա ժամկետում համատեղ մշակել «Զվարթնոց» օդանավակայանից Երևան տանող ճանապարհի հատվածի բարեկարգման, ճարտարապետական մոտեցումների, խորհրդանիշերի տեղադրման միասնական լուծումներ և համապատասխան փաթեթը ներկայացնել կառավարության աշխատակազմին:

Վարչապետը հանձնարարեց նաև Գյումրու քաղաքապետին` «Կումայրի-Վերածնունդ» ներդրումային ֆոնդի հետ համատեղ ապահովել «Շիրակ» օդանավակայանից Գյումրի, Գյումրիի հրապարակի հարակից տարածք և Երևան տանող ճանապարհների բարեկարգման, կանաչապատման աշխատանքները: