Կարևոր միջոցառումներին ընդառաջ` բարեկարգել ճանապարհները և միջավայրը. հանձնարարական

Այսօր կառավարության նիստում վարչապետ Կարեն Կարապետյանը հանձնարարական տվեց 2018թ. Հայաստանում կայանալիք միջոցառումների կապակցությամբ: Մասնավորապես` 2018-ին, կայանալու են երեք խոշոր իրադարձություններ` Հայաստանի Հանրապետության և մայիսյան հերոսամարտերի 100-ամյակը, Երևանի հիմնադրման 2800-ամյակի միջոցառումները, ինչպես նաև հոկտեմբեր ամսին ֆրանկոֆոնիայի` Երևանում կայանալիք գագաթաժողովը:

Վարչապետի խոսքով` կազմակերպչական աշխատանքներն արդեն ընթացքի մեջ են, ակնկալվում են նաև զբոսաշրջային այցեր: Այդ իսկ պատճառով  տարածքային կառավարման և զարգացման նախարարին,  տրանսպորտի նախարարին, քաղաքաշինության պետական կոմիտեի նախագահին, զբոսաշրջության պետական կոմիտեի նախագահին, ՀՀ մարզպետերին, Երևանի ու Գյումրու քաղաքապետերին հանձնարարվեց երկամսյա ժամկետում համատեղ միջոցառումներ ձեռնարկել Երևանի, Գյումրու, այլ մարզկենտրոնների մուտքի և ելքի ճանապարհների, ճարտարապետական լուծումների կանոնակարգման և միջավայրի բարելավման վերաբերյալ:

Վարչապետը հանձնարարեց առանձնակի կարևորել «Զվարթնոց» օդանավակայանից դեպի Երևան տանող և «Շիրակ» օդանավակայանից Գյումրի տանող ճանապարհները: