Իսրայելի ոստիկանությունը Նեթանյահուի դեմ կոռուպցիայի մեղադրանքներ ներկայացնելու հիմքեր է գտել

Իսրայելի ոստիկանությունը 14 ամսվա հետաքննությունից հետո հիմքեր է գտել անմիջապես երկու գործով երկրի վարչապետ Բինյամին Նեթանյահուին կոռուպցիայի և վստահության չարաշահման մեղադրանքներ ներկայացնելու համար:

Ըստ Jpost-ի՝  Նեթանյահուն հաստատել է, որ պատրաստվում է մեղադրանքների ներկայացմանը՝ պնդելով, որ անմեղ է:

Այնուամենայնիվ, նա վստահեցրել է, որ կշարունակի ղեկավարել Իսրայելը «արդար և պատասխանատու կերպով»:

Իրավապահներն այդ գործի շրջանակներում  հետաքննում են վարչապետի կողմից գործարարներից թանկարժեք նվերներ ստանալու հանգամանքը: Ըստ կայքի՝ նա ստացել է թանկարժեք նվերներ: Քննությունը դրանք գնահատում է ավելի քան 280 հազար դոլար: Գործում ներգրավված է նաև պրոդյուսեր Արնոն Միլչինը, որը նույնպես կասկածվում է Նեթանյահուին կաշառքներ տալու մեջ:

Նեթանյահուի դեմ ներկայացված երկրորդ գործը «Եդիոտ Ահրոնոտ»-ի սեփականատիրոջ հետ է կապված, համաձայն որի` նա կառավարության գործունեությունը բարենպաստ կերպով լուսաբանելու համար պայմանավորվածություններ է ունեցել:

Նեթանյահուն նշել է, որ ինքն անօրինական բան չի արել: «Ընկերներից նվերներ ստանալն արգելված չէ»,- ասել է նա։