Նախագահի թեկնածուների մասին քննարկումները ՀՀԿ-ում կմեկնարկեն այս շաբաթ. Վահրամ Բաղդասարյան

Հայաստանի նախագահի ընտրությունները տեղի կունենան, ամենայն հավանականությամբ, մարտի 2-ին, իսկ թեկնածուների մասին քննարկումները ՀՀԿ ԳՄ նիստում կմեկնարկեն արդեն այս շաբաթ. խորհրդարանում լրագրողներին տեղեկացրեց ԱԺ Հանրապետական խմբակցության ղեկավար Վահրամ Բաղդասարյանը։

«Թեկնածուն պետք է լինի հեղինակավոր անձ, ով Սփյուռքում կունենա  ազդեցություն, լինի ապակուսականացված։ Այս չափորոշիչները պետք է պահպանենք: Ինչ վերաբերում է հարցին, թե կա՞ն նմանատիպ մարդիկ,  ապա մեր երկրում, այո, կան նման մարդիկ, անունները հիմա չեք կարող իմանալ, որովհետև մենք այդ քննարկումները դեռ չենք ծավալել»,- նշեց Բաղդասարյանը` հավելելով, որ ՀՀ 4-րդ նախագահը պետք է անկուսակցական լինի:

Ինչ վերաբերում է վարչապետի թեկնածուի հարցին, նա նշեց, որ մինչև վարչապետի թեկնածուին անցնելը պետք է քննարկեն նախագահի թեկնածուի հարցը: «Հիմա այդ հարցի հետ կապված որոշակի քննարկումներ չունենք»,- ասաց պատգամավորը:

Բաղդասարյանը, անդրադառնալով նախագահի մոտ խորհրդարանականների հետ տեղի ունեցած հանդիպմանը, ասաց, որ ընդհանուր հարցեր են քննարկվել, գնահատականներ նախագահի կողմից չեն հնչել: