ՀՀԿ-ՀՅԴ համագործակցության պտուղները չպետք է խակ-խակ քաղել. Վահրամ Բաղդասարյան

ՀՀԿ խմբակցության ղեկավար Վահրամ Բաղդասարյանն այսօր խորհրդարանական ճեպազրույցների ընթացքում անդրադարձավ ՀՀԿ-ՀՅԴ համագործակցության արդյունքում սպասվելիք դրական փոփոխություններին: Նրա խոսքով` այս համագործակցությունը երկարատև է, և դրա պտուղները չպետք է խակ-խակ քաղել:

«Մանրակրկիտ քննարկումներ են կազմակերպվել, և ժողովուրդն անպայման ականատես կլինի դրական արդյունքներին»,- ասաց նա:

Դիտարկմանը, թե Սերժ Սարգսյանը լուսավոր Հայաստանի մասին էր խոսում իր ելույթում, բայց որևէ դրական փոփոխություն չկա, ե՞րբ է լինելու այդ փոփոխությունը, Բաղդասարյանը պատասխանեց. «Ես ցավում եմ, որ մտածում եք`առավոտյան արթնանալու եք ու տեսնեք փոփոխությունները: Քաղաքական գործընթացներն աստիճանաբար են լինելու»:

Անդրադառնալով արդեն նախկին երեք նախարարների քաղաքական հետագա հանգրվանին` նա նշեց, որ նրանք կարող մարդիկ են, և կլինեն առաջարկություններ տարբեր ոլորտներից:

Հարցին, թե ՀՅԴ-ն ինչո՞ւ հիմա որոշեց համագործակցել իշխանությունների հետ, Բաղդասարյանը պատասխանեց. «ՀՅԴ-ն միշտ էլ բարձրաձայնել է խնդիրների մասին: Դաշնակցության համար սա պատեհ պահ էր, և նրանք կողմնակից էին խորհրդարանական կառավարման համակարգին և սահմանադրական բարեփոխումներից հետո սկսեցին համագործակցություն: Անգամ մեկ տարի առաջ վաղաժամկետ կլիներ մեր համագործակցությունը, որովհետև նրանց ծրագրային դրույթներում հստակ դրված էր պառլամենտական համակարգը»: