Կարեն Կարապետյանը վայելում է իմ և ամբողջ քաղաքական թիմի լիակատար վստահությունը. Սերժ Սարգսյան

Այսօր կառավարության հերթական նիստն է, որին ներկա է ՀՀ նախագահ Սերժ Սարգսյանը, ով ելույթով հանդես եկավ: Նախագահի խոսքով` կառավարության ծրագրի հաստատմամբ ազդարարվում է կառավարության գործունեության նոր շրջափուլը: «Մեր խնդիրն է այդ շրջափուլն անցկացնել արդյունավետ և հնարավորինս անցնցում»,- ասաց Սերժ Սարգսյանը:

Նա նշեց, որ վերջին խորհրդարանական ընտրությունները ցույց տվեցին` կառավարությունն աշխատանքը շարունակելու համար ունի անհրաժեշտ վստահության քվե:

«Մեր ստացած մանդատը բավարար էր` միայն Հանրապետականի ուժերով կառավարություն ձևավորելու համար, սակայն մենք որոշեցինք շարունակել նախկինում ստեղծված ձևաչափով համագործակցությունը: ՀՅԴ մեր գործընկերների հետ մենք ձևավորել ենք մի կառավարություն, որը, վստահ եմ, ունակ է լուծել իր առջև դրված բոլոր խնդիրները»,- ասաց նախագահը:

Նա նշեց, որ շարունակելու են գործել ավելի միասնական ու կուռ թիմով` հետևողականորեն իրականացնելով արդեն նախանշված ծրագրերը: Թիմը միասնական է գործելու ինչպես գործադիրում ու օրենսդիրում, այնպես էլ ՏԻՄ-երում:

«Կառավարության ներկայիս կազմը, վարչապետ Կարեն Կարապետյանի գլխավորությամբ, վայելում է իմ և ամբողջ քաղաքական թիմի լիակատար վստահությունը»,- հայտարարեց Սերժ Սարգսյանը:

Միաժամանակ, նա ընդգծեց, որ, որպես հանրապետության նախագահ և ՀՀԿ նախագահ, չունի որևէ նախապաշարում և պատրաստ են աշխատել բոլոր կառուցողական ուժերի հետ: